tujh pe jaan dene ko tayyar koi to hoga

tujh pe jaañ dene ko tayyār koī to hogā

zindagī terā talabgār koī to hogā

taḳhta-e-dār pe chāhe jise laTkā diije

itne logoñ meñ gunahgār koī to hogā

koī dīvāna to lalkāregā aatī rut ko

vāqi'a phir sar-e-bāzār koī to hogā

koī to raat ko dekhegā javāñ hote hue

is bhare shahr meñ bedār koī to hogā

dil ke andar bhī to maujūd hai duniyā kā zamīr

aap se bar-sar-e-paikār koī to hogā

shaam ko roz nahātā hai lahū meñ sūraj

nahīñ khultā magar asrār koī to hogā

maiñ yahī soch ke jangal se nikal aayā thā

shahr meñ sāya-e-dīvār koī to hogā

ḳhushk miTTī se bhī ḳhushbū tirī aatī hogī

miT chukā ghar magar āsār koī to hogā

kyuuñ khiñche jaate haiñ roz us kī taraf ham 'shahzād'

us kī jānib se bhī isrār koī to hogā

tujh pe jaan dene ko tayyar koi to hoga

zindagi tera talabgar koi to hoga

taKHta-e-dar pe chahe jise laTka dije

itne logon mein gunahgar koi to hoga

koi diwana to lalkarega aati rut ko

waqi'a phir sar-e-bazar koi to hoga

koi to raat ko dekhega jawan hote hue

is bhare shahr mein bedar koi to hoga

dil ke andar bhi to maujud hai duniya ka zamir

aap se bar-sar-e-paikar koi to hoga

sham ko roz nahata hai lahu mein suraj

nahin khulta magar asrar koi to hoga

main yahi soch ke jangal se nikal aaya tha

shahr mein saya-e-diwar koi to hoga

KHushk miTTi se bhi KHushbu teri aati hogi

miT chuka ghar magar aasar koi to hoga

kyun khinche jate hain roz us ki taraf hum 'shahzad'

us ki jaanib se bhi israr koi to hoga