tujhse girwida yak zamana raha

tujh se girvīda yak zamāna rahā

kuchh faqat maiñ hī mubtalā na rahā

aap ko ab huī hai qadr-e-vafā

jab ki maiñ lā.iq-e-jafā na rahā

rāh-o-rasm-e-vafā vo bhuul ga.e

ab hameñ bhī koī gila na rahā

husn ḳhud ho gayā ġharīb-navāz

ishq muhtāj-e-iltejā na rahā

bas-ki nazzāra-soz thā vo jamāl

hosh-e-nazzārgī bajā na rahā

maiñ kabhī tujh se bad-gumāñ na huā

tū kabhī mujh se āshnā na rahā

aap kā shauq bhī to ab dil meñ

aap kī yaad ke sivā na rahā

aur bhī ho ga.e vo ġhāfil-e-ḳhvāb

nāla-e-sub.h-e-nā-rasā na rahā

husn kā naaz āshiqī kā niyāz

ab to kuchh bhī vo mājrā na rahā

ishq jab shikva sanj-e-husn huā

iltijā ho ga.ī gila na rahā

ham bharose pe un ke baiTh rahe

jab kisī kā bhī aasrā na rahā

mere ġham kī huī unheñ bhī ḳhabar

ab to ye dard lā-davā na rahā

aarzū terī barqarār rahe

dil kā kyā hai rahā rahā na rahā

ho ga.e ḳhatm mujh pe jaur-e-falak

ab koī morid-e-balā na rahā

jab se dekhī abul-kalām kī nasr

nazm-e-'hasrat' meñ bhī mazā na rahā

tujh se girwida yak zamana raha

kuchh faqat main hi mubtala na raha

aap ko ab hui hai qadr-e-wafa

jab ki main laiq-e-jafa na raha

rah-o-rasm-e-wafa wo bhul gae

ab hamein bhi koi gila na raha

husn KHud ho gaya gharib-nawaz

ishq muhtaj-e-ilteja na raha

bas-ki nazzara-soz tha wo jamal

hosh-e-nazzargi baja na raha

main kabhi tujh se bad-guman na hua

tu kabhi mujh se aashna na raha

aap ka shauq bhi to ab dil mein

aap ki yaad ke siwa na raha

aur bhi ho gae wo ghafil-e-KHwab

nala-e-subh-e-na-rasa na raha

husn ka naz aashiqi ka niyaz

ab to kuchh bhi wo majra na raha

ishq jab shikwa sanj-e-husn hua

iltija ho gai gila na raha

hum bharose pe un ke baiTh rahe

jab kisi ka bhi aasra na raha

mere gham ki hui unhen bhi KHabar

ab to ye dard la-dawa na raha

aarzu teri barqarar rahe

dil ka kya hai raha raha na raha

ho gae KHatm mujh pe jaur-e-falak

ab koi morid-e-bala na raha

jab se dekhi abul-kalam ki nasr

nazm-e-'hasrat' mein bhi maza na raha