tum puchho aur main na bataun aise to haalat nahin

tum pūchho aur maiñ na batā.ūñ aise to hālāt nahīñ

ek zarā sā dil TuuTā hai aur to koī baat nahīñ

kis ko ḳhabar thī sāñvle bādal bin barse uḌ jaate haiñ

sāvan aayā lekin apnī qismat meñ barsāt nahīñ

TuuT gayā jab dil to phir ye saañs kā naġhma kyā ma.anī

guuñj rahī hai kyuuñ shahnā.ī jab koī bārāt nahīñ

ġham ke añdhiyāre meñ tujh ko apnā sāthī kyuuñ samjhūñ

tū phir tū hai merā to saaya bhī mere saath nahīñ

maanā jīvan meñ aurat ik baar mohabbat kartī hai

lekin mujh ko ye to batā de kyā tū aurat zaat nahīñ

ḳhatm huā merā fasāna ab ye aañsū poñchh bhī lo

jis meñ koī taarā chamke aaj kī raat vo raat nahīñ

mere ġhamgīñ hone par ahbāb haiñ yuuñ hairān 'qatīl'

jaise maiñ patthar huuñ mere siine meñ jazbāt nahīñ

tum puchho aur main na bataun aise to haalat nahin

ek zara sa dil TuTa hai aur to koi baat nahin

kis ko KHabar thi sanwle baadal bin barse uD jate hain

sawan aaya lekin apni qismat mein barsat nahin

TuT gaya jab dil to phir ye sans ka naghma kya mani

gunj rahi hai kyun shahnai jab koi baraat nahin

gham ke andhiyare mein tujh ko apna sathi kyun samjhun

tu phir tu hai mera to saya bhi mere sath nahin

mana jiwan mein aurat ek bar mohabbat karti hai

lekin mujh ko ye to bata de kya tu aurat zat nahin

KHatm hua mera fasana ab ye aansu ponchh bhi lo

jis mein koi tara chamke aaj ki raat wo raat nahin

mere ghamgin hone par ahbab hain yun hairan 'qatil'

jaise main patthar hun mere sine mein jazbaat nahin