tumhaari chahat ki chandni se har ek shab-e-gham sanwar gai hai

tumhārī chāhat kī chāñdnī se har ik shab-e-ġham sañvar ga.ī hai

sunahrī poroñ se ḳhvāb-reze sameTtī har sahar ga.ī hai

mahakte jhoñke ke harf-e-taskīñ meñ jaanī pahchānī larzisheñ thiiñ

tumhārī sāñsoñ kī aañch kitnī qarīb aa kar guzar ga.ī hai

ab is kā chāra hī kyā ki apnī talab hī lā-intihā thī varna

vo aañkh jab bhī uThī hai dāmān-e-dard phūloñ se bhar ga.ī hai

na thā na hogā kabhī mayassar sukūn jo tere qurb meñ hai

ye vaqt kī jhiil jis meñ har lahr jaise thak kar Thahar ga.ī hai

ye barf-zār-e-ḳhayāl jis meñ na saut-e-gul hai na aks-e-naġhma

tirī tavajjoh se ātish-e-shauq isī ko gulzār kar ga.ī hai

ye kaun dīvāne reg-e-sahrā ko mauja-e-ḳhūñ se sīñchte haiñ

koī kaho is junūñ kī us nau-bahār tak bhī ḳhabar ga.ī hai

'ziyā' diloñ meñ ġhubār kyā kyā the ro.e jī bhar ke jab mile vo

vo abr barsā hai ab ke sāvan ki pattī pattī nikhar ga.ī hai

tumhaari chahat ki chandni se har ek shab-e-gham sanwar gai hai

sunahri poron se KHwab-reze sameTti har sahar gai hai

mahakte jhonke ke harf-e-taskin mein jaani pahchani larzishen thin

tumhaari sanson ki aanch kitni qarib aa kar guzar gai hai

ab is ka chaara hi kya ki apni talab hi la-intiha thi warna

wo aankh jab bhi uThi hai daman-e-dard phulon se bhar gai hai

na tha na hoga kabhi mayassar sukun jo tere qurb mein hai

ye waqt ki jhil jis mein har lahr jaise thak kar Thahar gai hai

ye barf-zar-e-KHayal jis mein na saut-e-gul hai na aks-e-naghma

teri tawajjoh se aatish-e-shauq isi ko gulzar kar gai hai

ye kaun diwane reg-e-sahra ko mauja-e-KHun se sinchte hain

koi kaho is junun ki us nau-bahaar tak bhi KHabar gai hai

'ziya' dilon mein ghubar kya kya the roe ji bhar ke jab mile wo

wo abr barsa hai ab ke sawan ki patti patti nikhar gai hai