tumhein kyunkar bataen zindagi ko kya samajhte hain

tumheñ kyūñkar batā.eñ zindagī ko kyā samajhte haiñ

samajh lo saañs lenā ḳhud-kushī karnā samajhte haiñ

kisī badmast ko rāz-āshnā sab kā samajhte haiñ

nigāh-e-yār tujh ko kyā batā.eñ kyā samajhte haiñ

bas itne par hameñ sab log dīvāna samajhte haiñ

ki is duniyā ko ham ik dūsrī duniyā samajhte haiñ

kahāñ kā vasl tanhā.ī ne shāyad bhes badlā hai

tire dam bhar ke mil jaane ko ham bhī kyā samajhte haiñ

umīdoñ meñ bhī un kī ek shān-e-be-niyāzī hai

har āsānī ko jo dushvār ho jaanā samajhte haiñ

yahī zid hai to ḳhair āñkheñ uThāte haiñ ham us jānib

magar ai dil ham is meñ jaan kā khaTkā samajhte haiñ

kahīñ hoñ tere dīvāne Thahar jaa.eñ to zindāñ hai

jidhar ko muñh uThā kar chal paḌe sahrā samajhte haiñ

jahāñ kī fitrat-e-begāna meñ jo kaif-e-ġham bhar deñ

vahī jiinā samajhte haiñ vahī marnā samajhte haiñ

hamārā zikr kyā ham ko to hosh aayā mohabbat meñ

magar ham qais kā dīvāna ho jaanā samajhte haiñ

na shoḳhī shoḳh hai itnī na purkār itnī purkārī

na jaane log terī sādgī ko kyā samajhte haiñ

bhulā diiñ ek muddat kī jafā.eñ us ne ye kah kar

tujhe apnā samajhte the tujhe apnā samajhte haiñ

ye kah kar ābla-pā rauñdte jaate haiñ kāñToñ ko

jise talvoñ meñ kar leñ jazb use sahrā samajhte haiñ

ye hastī nīstī sab mauj-ḳhezī hai mohabbat kī

na ham qatra samajhte haiñ na ham dariyā samajhte haiñ

'firāq' is gardish-e-ayyām se kab kaam niklā hai

sahar hone ko bhī ham raat kaT jaanā samajhte haiñ

tumhein kyunkar bataen zindagi ko kya samajhte hain

samajh lo sans lena KHud-kushi karna samajhte hain

kisi badmast ko raaz-ashna sab ka samajhte hain

nigah-e-yar tujh ko kya bataen kya samajhte hain

bas itne par hamein sab log diwana samajhte hain

ki is duniya ko hum ek dusri duniya samajhte hain

kahan ka wasl tanhai ne shayad bhes badla hai

tere dam bhar ke mil jaane ko hum bhi kya samajhte hain

umidon mein bhi un ki ek shan-e-be-niyazi hai

har aasani ko jo dushwar ho jaana samajhte hain

yahi zid hai to KHair aankhen uThate hain hum us jaanib

magar ai dil hum is mein jaan ka khaTka samajhte hain

kahin hon tere diwane Thahar jaen to zindan hai

jidhar ko munh uTha kar chal paDe sahra samajhte hain

jahan ki fitrat-e-begana mein jo kaif-e-gham bhar den

wahi jina samajhte hain wahi marna samajhte hain

hamara zikr kya hum ko to hosh aaya mohabbat mein

magar hum qais ka diwana ho jaana samajhte hain

na shoKHi shoKH hai itni na purkar itni purkari

na jaane log teri sadgi ko kya samajhte hain

bhula din ek muddat ki jafaen us ne ye kah kar

tujhe apna samajhte the tujhe apna samajhte hain

ye kah kar aabla-pa raundte jate hain kanTon ko

jise talwon mein kar len jazb use sahra samajhte hain

ye hasti nisti sab mauj-KHezi hai mohabbat ki

na hum qatra samajhte hain na hum dariya samajhte hain

'firaq' is gardish-e-ayyam se kab kaam nikla hai

sahar hone ko bhi hum raat kaT jaana samajhte hain