tu bigaDta bhi hai KHas apne hi andaz ke sath

tū bigaḌtā bhī hai ḳhaas apne hī andāz ke saath

phuul khilte haiñ tire sho.ala-e-āvāz ke saath

ek baar aur bhī kyuuñ arz-e-tamannā na karūñ

ki tū inkār bhī kartā hai ajab naaz ke saath

lai jo TuuTī to sadā aa.ī shikast-e-dil kī

rag-e-jāñ kā koī rishta hai rag-e-sāz ke saath

tū pukāre to chamak uThtī haiñ merī āñkheñ

terī sūrat bhī hai shāmil tirī āvāz ke saath

jab tak arzāñ hai zamāne meñ kabūtar kā lahū

zulm hai rabt rakhūñ gar kisī shahbāz ke saath

past itnī to na thī merī shikast ai yaaro

par sameTe haiñ magar hasrat parvāz ke saath

pahre baiThe haiñ qafas par ki hai sayyād ko vahm

par-shikastoñ ko bhī ik rabt hai parvāz ke saath

umr bhar sañg-zanī karte rahe ahl-e-vatan

ye alag baat ki dafnā.eñge e.azāz ke saath

tu bigaDta bhi hai KHas apne hi andaz ke sath

phul khilte hain tere shoala-e-awaz ke sath

ek bar aur bhi kyun arz-e-tamanna na karun

ki tu inkar bhi karta hai ajab naz ke sath

lai jo TuTi to sada aai shikast-e-dil ki

rag-e-jaan ka koi rishta hai rag-e-saz ke sath

tu pukare to chamak uThti hain meri aankhen

teri surat bhi hai shamil teri aawaz ke sath

jab tak arzan hai zamane mein kabutar ka lahu

zulm hai rabt rakhun gar kisi shahbaz ke sath

past itni to na thi meri shikast ai yaro

par sameTe hain magar hasrat parwaz ke sath

pahre baiThe hain qafas par ki hai sayyaad ko wahm

par-shikaston ko bhi ek rabt hai parwaz ke sath

umr bhar sang-zani karte rahe ahl-e-watan

ye alag baat ki dafnaenge eazaz ke sath