us aaine mein dekhna hairat bhi aaegi

us aa.ine meñ dekhnā hairat bhī aa.egī

ik roz mujh pe us kī tabī.at bhī aa.egī

qadġhan lagā na ashkoñ pe yādoñ ke shahr meñ

hogā agar tamāshā to ḳhilqat bhī aa.egī

maiñ aa.ina banūñgā tū patthar uThā.egā

ik din khulī saḌak pe ye naubat bhī aa.egī

mausam agar hai sard to phir aag taap le

chamkegī aañkh ḳhuuñ meñ harārat bhī aa.egī

kuchh der aur shāḳh pe rahne de sabr kar

pakne de phal ko khāne meñ lazzat bhī aa.egī

āñkheñ haiñ tere paas to phir sat.h-e-āb par

gahrā.ī se ubhar ke ibārat bhī aa.egī

nikleñ charāġh haath meñ le kar gharoñ se log

sūraj kī rah meñ manzil-e-zulmat bhī aa.egī

ye jāntā to kāTtā 'sājid' na saa.e ko

talvār par lahū kī tamāzat bhī aa.egī

us aaine mein dekhna hairat bhi aaegi

ek roz mujh pe us ki tabiat bhi aaegi

qadghan laga na ashkon pe yaadon ke shahr mein

hoga agar tamasha to KHilqat bhi aaegi

main aaina banunga tu patthar uThaega

ek din khuli saDak pe ye naubat bhi aaegi

mausam agar hai sard to phir aag tap le

chamkegi aankh KHun mein hararat bhi aaegi

kuchh der aur shaKH pe rahne de sabr kar

pakne de phal ko khane mein lazzat bhi aaegi

aankhen hain tere pas to phir sath-e-ab par

gahrai se ubhar ke ibarat bhi aaegi

niklen charagh hath mein le kar gharon se log

suraj ki rah mein manzil-e-zulmat bhi aaegi

ye jaanta to kaTta 'sajid' na sae ko

talwar par lahu ki tamazat bhi aaegi