hazar kahta raha main ki yar ek minute

hazār kahtā rahā maiñ ki yaar ek minute

kiyā na us ne mirā intizār ek minute

maiñ jāntā huuñ ki hai ye ḳhumār ek minute

idhar bhī aa.ī thī mauj-e-bahār ek minute

patā chale ki hameñ kaun kaun chhoḌ gayā

zarā chhaTe to ye gard-o-ġhubār ek minute

abad talak hue ham us ke vasvasoñ ke asiir

kiyā thā jis pe kabhī e'tibār ek minute

agarche kuchh nahīñ auqāt ek hafte kī

jo sochiye to haiñ ye das hazār ek minute

phir aaj kaam se tāḳhīr ho ga.ī 'bāsir'

kisī ne ham se kahā baar baar ek minute

hazar kahta raha main ki yar ek minute

kiya na us ne mera intizar ek minute

main jaanta hun ki hai ye KHumar ek minute

idhar bhi aai thi mauj-e-bahaar ek minute

pata chale ki hamein kaun kaun chhoD gaya

zara chhaTe to ye gard-o-ghubar ek minute

abad talak hue hum us ke waswason ke asir

kiya tha jis pe kabhi e'tibar ek minute

agarche kuchh nahin auqat ek hafte ki

jo sochiye to hain ye das hazar ek minute

phir aaj kaam se taKHir ho gai 'basir'

kisi ne hum se kaha bar bar ek minute