mujhse chunan-chunin na karo main nashe main hun

mujh se chunāñ-chunīñ na karo maiñ nashe maiñ huuñ

maiñ jo kahūñ nahīñ na karo maiñ nashe meñ huuñ

insāñ nashe meñ ho to vo chhuptā nahīñ kabhī

har-chand tum yaqīñ na karo maiñ nashe meñ huuñ

ye vaqt hai farāḳh-dilī ke sulūk kā

tañg apnī āstīñ na karo maiñ nashe meñ huuñ

be-iḳhtiyār chuum na luuñ maiñ kahīñ inheñ

āñkhoñ ko ḳhashmagīñ na karo maiñ nashe meñ huuñ

har-chand mere haq meñ hai ye rahmat-e-ḳhudā

āñchal mire qarīñ na karo maiñ nashe meñ huuñ

nashshe meñ surḳh rañg tahī-az-ḳhatar nahī.?

hoñToñ ko ahmarīñ na karo maiñ nashe meñ huuñ

dekho maiñ kah rahā huuñ tumheñ pai-ba-pai 'adam'

mujh ko bahut hazīñ na karo maiñ nashe meñ huuñ

mujh se chunan-chunin na karo main nashe main hun

main jo kahun nahin na karo main nashe mein hun

insan nashe mein ho to wo chhupta nahin kabhi

har-chand tum yaqin na karo main nashe mein hun

ye waqt hai faraKH-dili ke suluk ka

tang apni aastin na karo main nashe mein hun

be-iKHtiyar chum na lun main kahin inhen

aankhon ko KHashmagin na karo main nashe mein hun

har-chand mere haq mein hai ye rahmat-e-KHuda

aanchal mere qarin na karo main nashe mein hun

nashshe mein surKH rang tahi-az-KHatar nahi?

honTon ko ahmarin na karo main nashe mein hun

dekho main kah raha hun tumhein pai-ba-pai 'adam'

mujh ko bahut hazin na karo main nashe mein hun