phirte hain kab se dar-ba-dar ab is nagar ab us nagar ek dusre ke ham-safar main aur meri aawargi

phirte haiñ kab se dar-ba-dar ab is nagar ab us nagar ik dūsre ke ham-safar maiñ aur mirī āvārgī

nā-āshnā har rah-guzar nā-mehrbāñ har ik nazar jaa.eñ to ab jaa.eñ kidhar maiñ aur mirī āvārgī

ham bhī kabhī ābād the aise kahāñ barbād the be-fikr the āzād the masrūr the dil-shād the

vo chaal aisī chal gayā ham bujh ga.e dil jal gayā nikle jalā ke apnā ghar maiñ aur mirī āvārgī

jiinā bahut āsān thā ik shaḳhs kā ehsān thā ham ko bhī ik armān thā jo ḳhvāb kā sāmān thā

ab ḳhvāb hai nai aarzū armān hai nai justujū yuuñ bhī chalo ḳhush haiñ magar maiñ aur mirī āvārgī

vo māh-vash vo māh-rū vo māh-kām-e-hū-ba-hū thiiñ jis kī bāteñ kū-ba-kū us se ajab thī guftugū

phir yuuñ huā vo kho ga.ī to mujh ko zid sī ho ga.ī lā.eñge us ko DhūñD kar maiñ aur mirī āvārgī

ye dil hī thā jo sah gayā vo baat aisī kah gayā kahne ko phir kyā rah gayā ashkoñ kā dariyā bah gayā

jab kah ke vo dilbar gayā tere liye maiñ mar gayā rote haiñ us ko raat bhar maiñ aur mirī āvārgī

ab ġham uThā.eñ kis liye aañsū bahā.eñ kis liye ye dil jalā.eñ kis liye yuuñ jaañ gañvā.eñ kis liye

pesha na ho jis kā sitam DhūñDeñge ab aisā sanam hoñge kahīñ to kārgar maiñ aur mirī āvārgī

āsār haiñ sab khoT ke imkān haiñ sab choT ke ghar band haiñ sab goT ke ab ḳhatm haiñ sab ToTke

qismat kā sab ye pher hai andher hai andher hai aise hue haiñ be-asar maiñ aur mirī āvārgī

jab hamdam-o-hamrāz thā tab aur hī andāz thā ab soz hai tab saaz thā ab sharm hai tab naaz thā

ab mujh se ho to ho bhī kyā hai saath vo to vo bhī kyā ik be-hunar ik be-samar maiñ aur mirī āvārgī

phirte hain kab se dar-ba-dar ab is nagar ab us nagar ek dusre ke ham-safar main aur meri aawargi

na-ashna har rah-guzar na-mehrban har ek nazar jaen to ab jaen kidhar main aur meri aawargi

hum bhi kabhi aabaad the aise kahan barbaad the be-fikr the aazad the masrur the dil-shad the

wo chaal aisi chal gaya hum bujh gae dil jal gaya nikle jala ke apna ghar main aur meri aawargi

jina bahut aasan tha ek shaKHs ka ehsan tha hum ko bhi ek arman tha jo KHwab ka saman tha

ab KHwab hai nai aarzu arman hai nai justuju yun bhi chalo KHush hain magar main aur meri aawargi

wo mah-wash wo mah-ru wo mah-kaam-e-hu-ba-hu thin jis ki baaten ku-ba-ku us se ajab thi guftugu

phir yun hua wo kho gai to mujh ko zid si ho gai laenge us ko DhunD kar main aur meri aawargi

ye dil hi tha jo sah gaya wo baat aisi kah gaya kahne ko phir kya rah gaya ashkon ka dariya bah gaya

jab kah ke wo dilbar gaya tere liye main mar gaya rote hain us ko raat bhar main aur meri aawargi

ab gham uThaen kis liye aansu bahaen kis liye ye dil jalaen kis liye yun jaan ganwaen kis liye

pesha na ho jis ka sitam DhunDenge ab aisa sanam honge kahin to kargar main aur meri aawargi

aasar hain sab khoT ke imkan hain sab choT ke ghar band hain sab goT ke ab KHatm hain sab ToTke

qismat ka sab ye pher hai andher hai andher hai aise hue hain be-asar main aur meri aawargi

jab hamdam-o-hamraaz tha tab aur hi andaz tha ab soz hai tab saz tha ab sharm hai tab naz tha

ab mujh se ho to ho bhi kya hai sath wo to wo bhi kya ek be-hunar ek be-samar main aur meri aawargi