wan hai ye bad-gumani jawe hijab kyunkar

vaañ hai ye bad-gumānī jaave hijāb kyūñkar

do din ke vāste ho koī ḳharāb kyūñkar

qāsid javāb-e-ḳhat ham likh deñ shitāb kyūñkar

vaañ to javāb māñgā likhiye javāb kyūñkar

ḳhvāb-o-ḳhayāl suunā yaañ ho gayā hai jis bin

hairāñ huuñ maiñ ki us ko aave hai ḳhvāb kyūñkar

us sabza-rañg kī hai garmī-e-husn goyā

chamke hai mahr dekho zer-e-sahāb kyūñkar

kahtī haiñ chitvaneñ yuuñ ban-Than ke jab vo nikle

ab dekhne kī dekheñ lāvegā taab kyūñkar

vo vasl meñ bhī hañs hañs pūchhe hai lo batāo

kal ro.eñgī tumhārī chashm-e-pur-āb kyūñkar

dil jis se lag gayā hai vo chhup rahā hai ham se

dauḌe phireñ na har sū pur-iztirāb kyūñkar

allāh-re bhulāpā muñh dho ke ḳhud vo bole

''sūñgho to ho gayā ye paanī gulāb kyūñkar''

chālākiyoñ ko sun kar us ġhairat-e-parī kī

gar ruk ke kahiye us kī ham laa.eñ taab kyūñkar

to yuuñ lage jatāne ''miyāñ tum to ho divāne

rahne de ham ko nichlā ahd-e-shabāb kyūñkar''

avval bhī ḳhaak hī the āḳhir bhī ḳhaak hoñge

har dam kaheñ na 'jur.at' yā bū-turāb kyūñkar

wan hai ye bad-gumani jawe hijab kyunkar

do din ke waste ho koi KHarab kyunkar

qasid jawab-e-KHat hum likh den shitab kyunkar

wan to jawab manga likhiye jawab kyunkar

KHwab-o-KHayal suna yan ho gaya hai jis bin

hairan hun main ki us ko aawe hai KHwab kyunkar

us sabza-rang ki hai garmi-e-husn goya

chamke hai mahr dekho zer-e-sahab kyunkar

kahti hain chitwanen yun ban-Than ke jab wo nikle

ab dekhne ki dekhen lawega tab kyunkar

wo wasl mein bhi hans hans puchhe hai lo batao

kal roengi tumhaari chashm-e-pur-ab kyunkar

dil jis se lag gaya hai wo chhup raha hai hum se

dauDe phiren na har su pur-iztirab kyunkar

allah-re bhulapa munh dho ke KHud wo bole

sungho to ho gaya ye pani gulab kyunkar

chaalakiyon ko sun kar us ghairat-e-pari ki

gar ruk ke kahiye us ki hum laen tab kyunkar

to yun lage jatane miyan tum to ho diwane

rahne de hum ko nichla ahd-e-shabab kyunkar

awwal bhi KHak hi the aaKHir bhi KHak honge

har dam kahen na 'jurat' ya bu-turab kyunkar