wahan ki raushniyon ne bhi zulm Dhae bahut

vahāñ kī raushniyoñ ne bhī zulm Dhaa.e bahut

maiñ us galī meñ akelā thā aur saa.e bahut

kisī ke sar pe kabhī TuuT kar girā hī nahīñ

is āsmāñ ne havā meñ qadam jamā.e bahut

na jaane rut kā tasarruf thā yā nazar kā fareb

kalī vahī thī magar rang jhilmilā.e bahut

havā kā ruḳh hī achānak badal gayā varna

mahak ke qāfile sahrā kī samt aa.e bahut

ye kā.enāt hai merī hī ḳhaak kā zarra

maiñ apne dasht se guzrā to bhed paa.e bahut

jo motiyoñ kī talab ne kabhī udaas kiyā

to ham bhī raah se kankar sameT laa.e bahut

bas ek raat Thaharnā hai kyā gila kiije

musāfiroñ ko ġhanīmat hai ye sarā.e bahut

jamī rahegī nigāhoñ pe tīrgī din bhar

ki raat ḳhvāb meñ taare utar ke aa.e bahut

'shakeb' kaisī uḌaan ab vo par hī TuuT ga.e

ki zer-e-dām jab aa.e the phaḌphaḌā.e bahut

wahan ki raushniyon ne bhi zulm Dhae bahut

main us gali mein akela tha aur sae bahut

kisi ke sar pe kabhi TuT kar gira hi nahin

is aasman ne hawa mein qadam jamae bahut

na jaane rut ka tasarruf tha ya nazar ka fareb

kali wahi thi magar rang jhilmilae bahut

hawa ka ruKH hi achanak badal gaya warna

mahak ke qafile sahra ki samt aae bahut

ye kaenat hai meri hi KHak ka zarra

main apne dasht se guzra to bhed pae bahut

jo motiyon ki talab ne kabhi udas kiya

to hum bhi rah se kankar sameT lae bahut

bas ek raat Thaharna hai kya gila kije

musafiron ko ghanimat hai ye sarae bahut

jami rahegi nigahon pe tirgi din bhar

ki raat KHwab mein tare utar ke aae bahut

'shakeb' kaisi uDan ab wo par hi TuT gae

ki zer-e-dam jab aae the phaDphaDae bahut