wahshat ke sath dasht meri jaan chahiye

vahshat ke saath dasht mirī jaan chāhiye

is aish ke liye sar-o-sāmān chāhiye

kuchh ishq ke nisāb meñ kamzor ham bhī haiñ

kuchh parcha-e-savāl bhī āsān chāhiye

tujh ko supurdagī meñ simaTnā bhī hai zarūr

sachchā hai kārobār to nuqsān chāhiye

ab tak kis intizār meñ baiThe hue haiñ log

ummīd ke liye koī imkān chāhiye

hogā yahāñ na dast-o-garebāñ kā faisla

is ke liye to hashr kā maidān chāhiye

āḳhir hai e'tibār-e-tamāshā bhī koī chiiz

insān thoḌī der ko hairān chāhiye

jaarī haiñ pā-e-shauq kī īzā-rasānīyāñ

ab kuchh nahīñ to sair-e-bayābān chāhiye

sab shā.irāñ ḳharīda-e-darbār ho ga.e

ye vāqi.a to dāḳhil-e-dīvān chāhiye

mulk-e-suḳhan meñ yuuñ nahīñ aane kā inqalāb

do-chār baar nuun kā elaan chāhiye

apnā bhī muddatoñ se hai ruq.a lagā huā

bilqīs-e-shā.irī ko sulaimān chāhiye

wahshat ke sath dasht meri jaan chahiye

is aish ke liye sar-o-saman chahiye

kuchh ishq ke nisab mein kamzor hum bhi hain

kuchh parcha-e-sawal bhi aasan chahiye

tujh ko supurdagi mein simaTna bhi hai zarur

sachcha hai karobar to nuqsan chahiye

ab tak kis intizar mein baiThe hue hain log

ummid ke liye koi imkan chahiye

hoga yahan na dast-o-gareban ka faisla

is ke liye to hashr ka maidan chahiye

aaKHir hai e'tibar-e-tamasha bhi koi chiz

insan thoDi der ko hairan chahiye

jari hain pa-e-shauq ki iza-rasaniyan

ab kuchh nahin to sair-e-bayaban chahiye

sab shairan KHarida-e-darbar ho gae

ye waqia to daKHil-e-diwan chahiye

mulk-e-suKHan mein yun nahin aane ka inqalab

do-chaar bar nun ka elan chahiye

apna bhi muddaton se hai ruqa laga hua

bilqis-e-shairi ko sulaiman chahiye