wahshi the bu-e-gul ki tarah is jahan mein hum

vahshī the bū-e-gul kī tarah is jahāñ meñ ham

nikle to phir ke aa.e na apne makāñ meñ ham

sākin haiñ josh-e-ashk se āb-e-ravāñ meñ ham

rahte haiñ misl-e-mardum-e-ābī jahāñ meñ ham

shaidā-e-rū-e-gul na to shaidā-e-qadd-e-sarv

sayyād ke shikār haiñ is bostāñ meñ ham

niklī laboñ se aah ki gardūñ nishāna thā

goyā ki tiir joḌe hue the kamāñ meñ ham

ālūda-e-gunāh hai apnā riyāz bhī

shab kāTte haiñ jaag ke muġh kī dukāñ meñ ham

himmat pas-az-fanā sabab-e-zikr-e-ḳhair hai

murdoñ kā naam sunte haiñ har dāstāñ meñ ham

saaqī hai yār-e-māh-liqā hai sharāb hai

ab bādshāh-e-vaqt haiñ apne makāñ meñ ham

nairañg-e-rozgār se aiman haiñ shakl-e-sarv

rakhte haiñ ek haal bahār-o-ḳhizāñ meñ ham

duniyā o āḳhirat meñ talabgār haiñ tire

hāsil tujhe samajhte haiñ donoñ jahāñ meñ ham

paidā huā hai apne liye boriyā-e-faqr

ye nīstāñ hai sher haiñ is nīstāñ meñ ham

ḳhvāhāñ koī nahīñ to kuchh is kā ojab nahīñ

jins-e-girāñ-bahā haiñ falak kī dukāñ meñ ham

likkhā hai kis ke ḳhanjar-e-mizhgāñ kā us ne vasf

ik zaḳhm dekhte haiñ qalam kī zabāñ meñ ham

kyā haal hai kisī ne na pūchhā hazār haif

nālāñ rahe jaras kī tarah kārvāñ meñ ham

aayā hai yaar fātiha paḌhne ko qabr par

bedār baḳht-e-ḳhufta hai ḳhvāb-e-girāñ meñ ham

shāgird tarz-e-ḳhanda-zanī meñ hai gul tirā

ustād-e-andalīb haiñ soz-o-fuġhāñ meñ ham

bāġh-e-jahāñ ko yaad kareñge adam meñ kyā

kunj-e-qafas se tañg rahe āshiyāñ meñ ham

allāh-re be-qarārī-e-dil hijr-e-yār meñ

gaahe zamīñ meñ the to gahe āsmāñ meñ ham

darvāza band rakhte haiñ misl-e-hubāb-e-bahr

qufl-e-durūñ-ḳhāna haiñ apne makāñ meñ ham

'ātish' suḳhan kī qadr zamāne se uTh ga.ī

maqdūr ho to qufl lagā deñ zabāñ meñ ham

wahshi the bu-e-gul ki tarah is jahan mein hum

nikle to phir ke aae na apne makan mein hum

sakin hain josh-e-ashk se aab-e-rawan mein hum

rahte hain misl-e-mardum-e-abi jahan mein hum

shaida-e-ru-e-gul na to shaida-e-qadd-e-sarw

sayyaad ke shikar hain is bostan mein hum

nikli labon se aah ki gardun nishana tha

goya ki tir joDe hue the kaman mein hum

aaluda-e-gunah hai apna riyaz bhi

shab kaTte hain jag ke mugh ki dukan mein hum

himmat pas-az-fana sabab-e-zikr-e-KHair hai

murdon ka nam sunte hain har dastan mein hum

saqi hai yar-e-mah-liqa hai sharab hai

ab baadshah-e-waqt hain apne makan mein hum

nairang-e-rozgar se aiman hain shakl-e-sarw

rakhte hain ek haal bahaar-o-KHizan mein hum

duniya o aaKHirat mein talabgar hain tere

hasil tujhe samajhte hain donon jahan mein hum

paida hua hai apne liye boriya-e-faqr

ye nistan hai sher hain is nistan mein hum

KHwahan koi nahin to kuchh is ka ojab nahin

jins-e-giran-baha hain falak ki dukan mein hum

likkha hai kis ke KHanjar-e-mizhgan ka us ne wasf

ek zaKHm dekhte hain qalam ki zaban mein hum

kya haal hai kisi ne na puchha hazar haif

nalan rahe jaras ki tarah karwan mein hum

aaya hai yar fatiha paDhne ko qabr par

bedar baKHt-e-KHufta hai KHwab-e-giran mein hum

shagird tarz-e-KHanda-zani mein hai gul tera

ustad-e-andalib hain soz-o-fughan mein hum

bagh-e-jahan ko yaad karenge adam mein kya

kunj-e-qafas se tang rahe aashiyan mein hum

allah-re be-qarari-e-dil hijr-e-yar mein

gahe zamin mein the to gahe aasman mein hum

darwaza band rakhte hain misl-e-hubab-e-bahr

qufl-e-durun-KHana hain apne makan mein hum

'atish' suKHan ki qadr zamane se uTh gai

maqdur ho to qufl laga den zaban mein hum