jahan mein aae na koi kami mohabbat ki

jahāñ meñ aa.e na koī kamī mohabbat kī

sadā lagātā rahūñgā yūñhī mohabbat kī

ye dil jo baaġh kī sūrat mahak rahā hai miyāñ

kabhī khilī thī yahāñ ik kalī mohabbat kī

na jaane kitne hī lamhe palak pe Thahr ga.e

kisī ne baat jo chheḌī kabhī mohabbat kī

rakhā hai ek hī me.aar har mohabbat meñ

so jis kisī se bhī kī ek sī mohabbat kī

thā pahlī pahlī mohabbat kā nashsha ḳhuub magar

kuchh aur baat hai is āḳhirī mohabbat kī

ye shahr-e-dil ke makīnoñ ko ḳhuub hai mālūm

har ik pe khultī nahīñ hai galī mohabbat kī

na māl-o-zar kī talab phir use huī koī

jise nasīb huī hai parī mohabbat kī

jab aa.ine meñ nazar aa.e koī aur hī shaḳhs

hai pahlī pahlī alāmat yahī mohabbat kī

vahī to jaan sakegā hamārā haal 'aqīl'

vo jis ne hijr sahā yā kabhī mohabbat kī

jahan mein aae na koi kami mohabbat ki

sada lagata rahunga yunhi mohabbat ki

ye dil jo bagh ki surat mahak raha hai miyan

kabhi khili thi yahan ek kali mohabbat ki

na jaane kitne hi lamhe palak pe Thahr gae

kisi ne baat jo chheDi kabhi mohabbat ki

rakha hai ek hi mear har mohabbat mein

so jis kisi se bhi ki ek si mohabbat ki

tha pahli pahli mohabbat ka nashsha KHub magar

kuchh aur baat hai is aaKHiri mohabbat ki

ye shahr-e-dil ke makinon ko KHub hai malum

har ek pe khulti nahin hai gali mohabbat ki

na mal-o-zar ki talab phir use hui koi

jise nasib hui hai pari mohabbat ki

jab aaine mein nazar aae koi aur hi shaKHs

hai pahli pahli alamat yahi mohabbat ki

wahi to jaan sakega hamara haal 'aqil'

wo jis ne hijr saha ya kabhi mohabbat ki