wo be-niyaz mujhe uljhanon mein Dal gaya

vo be-niyāz mujhe uljhanoñ meñ Daal gayā

ki jis ke pyaar meñ ehsās-e-māh-o-sāl gayā

har ek baat ke yuuñ to diye javāb us ne

jo ḳhaas baat thī har baar hañs ke Taal gayā

ka.ī savāl the jo maiñ ne soch rakkhe the

vo aa gayā to mujhe bhuul har savāl gayā

jo umr jazboñ kā sailāb ban ke aa.ī thī

guzar ga.ī to lagā daur-e-e'tidāl gayā

vo ek zaat jo ḳhvāb-o-ḳhayāl laa.ī thī

isī ke saath har ik ḳhvāb har ḳhayāl gayā

use to is kā koī rañj bhī na ho shāyad

ki us kī bazm se koī shikasta-hāl gayā

wo be-niyaz mujhe uljhanon mein Dal gaya

ki jis ke pyar mein ehsas-e-mah-o-sal gaya

har ek baat ke yun to diye jawab us ne

jo KHas baat thi har bar hans ke Tal gaya

kai sawal the jo main ne soch rakkhe the

wo aa gaya to mujhe bhul har sawal gaya

jo umr jazbon ka sailab ban ke aai thi

guzar gai to laga daur-e-e'tidal gaya

wo ek zat jo KHwab-o-KHayal lai thi

isi ke sath har ek KHwab har KHayal gaya

use to is ka koi ranj bhi na ho shayad

ki us ki bazm se koi shikasta-haal gaya