wo chup tha dida-e-nam bolte the

vo chup thā dīda-e-nam bolte the

ki us ke chehre se ġham bolte the

sabab ḳhāmoshiyoñ kā maiñ nahīñ thā

mire ghar meñ sabhī kam bolte the

yahī jo shahr kā hai aaj markaz

yahāñ sannāTe paiham bolte the

taraste haiñ usī tanhā.ī ko ham

koī suntā thā aur ham bolte the

koī bhī ghar meñ jab hotā nahīñ thā

dar-o-dīvār bāham bolte the

unhīñ se bolnā sīkhā thā ham ne

vahī jo bazm meñ kam bolte the

wo chup tha dida-e-nam bolte the

ki us ke chehre se gham bolte the

sabab KHamoshiyon ka main nahin tha

mere ghar mein sabhi kam bolte the

yahi jo shahr ka hai aaj markaz

yahan sannaTe paiham bolte the

taraste hain usi tanhai ko hum

koi sunta tha aur hum bolte the

koi bhi ghar mein jab hota nahin tha

dar-o-diwar baham bolte the

unhin se bolna sikha tha hum ne

wahi jo bazm mein kam bolte the