wo humse dur hote ja rahe hain

vo ham se duur hote jā rahe haiñ

bahut maġhrūr hote jā rahe haiñ

bas ik tark-e-mohabbat ke irāde

hameñ manzūr hote jā rahe haiñ

manāzir the jo firdaus-e-tasavvur

vo sab mastūr hote jā rahe haiñ

badaltī jā rahī hai dil kī duniyā

na.e dastūr hote jā rahe haiñ

bahut maġhmūm the jo dīda-o-dil

bahut masrūr hote jā rahe haiñ

vafā par murdanī sī chhā chalī hai

sitam kā nuur hote jā rahe haiñ

kabhī vo paas aa.e jā rahe the

magar ab duur hote jā rahe haiñ

firāq o hijr ke tārīk lamhe

sarāpā nuur hote jā rahe haiñ

'shakīl' ehsās-e-gumnāmī se kah do

ki ham mash.hūr hote jā rahe haiñ

wo hum se dur hote ja rahe hain

bahut maghrur hote ja rahe hain

bas ek tark-e-mohabbat ke irade

hamein manzur hote ja rahe hain

manazir the jo firdaus-e-tasawwur

wo sab mastur hote ja rahe hain

badalti ja rahi hai dil ki duniya

nae dastur hote ja rahe hain

bahut maghmum the jo dida-o-dil

bahut masrur hote ja rahe hain

wafa par murdani si chha chali hai

sitam ka nur hote ja rahe hain

kabhi wo pas aae ja rahe the

magar ab dur hote ja rahe hain

firaq o hijr ke tarik lamhe

sarapa nur hote ja rahe hain

'shakil' ehsas-e-gumnami se kah do

ki hum mashhur hote ja rahe hain