wo hashr-KHez inayat par utar aaya

vo hashr-ḳhez ināyāt par utar aaya

balā kā rang hai aur raat par utar aaya

maiñ ḳhud udaas khaḌā thā kaTe daraḳht ke paas

parinda uḌ ke mire haath par utar aaya

vo mujh se toḌne vaalā hai phir koī va.ada

vo phir siyāsī bayānāt par utar aaya

tirī jo baat mire dil ko haath Dāltī hai

maiñ kyoñ ghumā ke usī baat par utar aaya

ḳhudā kahāñ hai bas itnā savāl thā merā

ḳhudā kā banda mirī zaat par utar aaya

vo pahle-pahl to mujh se hī pyaar kartā thā

phir us ke baad kamālāt par utar aaya

zarā sī baat thī ashkoñ ko pī gayā hotā

ġharīb shaḳhs thā auqāt par utar aaya

gayā to phir mire takiye se note nikle haiñ

amiir hote hī ḳhairāt par utar aaya

vo lā-javāb huā jab zabān se ḳhāmosh

to us kā chehra savālāt par utar aaya

wo hashr-KHez inayat par utar aaya

bala ka rang hai aur raat par utar aaya

main KHud udas khaDa tha kaTe daraKHt ke pas

parinda uD ke mere hath par utar aaya

wo mujh se toDne wala hai phir koi wada

wo phir siyasi bayanat par utar aaya

teri jo baat mere dil ko hath Dalti hai

main kyon ghuma ke usi baat par utar aaya

KHuda kahan hai bas itna sawal tha mera

KHuda ka banda meri zat par utar aaya

wo pahle-pahl to mujh se hi pyar karta tha

phir us ke baad kamalat par utar aaya

zara si baat thi ashkon ko pi gaya hota

gharib shaKHs tha auqat par utar aaya

gaya to phir mere takiye se note nikle hain

amir hote hi KHairaat par utar aaya

wo la-jawab hua jab zaban se KHamosh

to us ka chehra sawalat par utar aaya