wo naqab aap se uTh jae to kuchh dur nahin

vo naqāb aap se uTh jaa.e to kuchh duur nahīñ

varna merī nigah-e-shauq bhī majbūr nahīñ

ḳhātir-e-ahl-e-nazar husn ko manzūr nahīñ

is meñ kuchh terī ḳhatā dīda-e-mahjūr nahīñ

laakh chhupte ho magar chhup ke bhī mastūr nahīñ

tum ajab chiiz ho nazdīk nahīñ duur nahīñ

jur.at-e-arz pe vo kuchh nahīñ kahte lekin

har adā se ye Tapaktā hai ki manzūr nahīñ

dil dhaḌak uThtā hai ḳhud apnī hī har aahaT par

ab qadam manzil-e-jānāñ se bahut duur nahīñ

haa.e vo vaqt ki jab be-piye mad-hoshī thī

haa.e ye vaqt ki ab pī ke bhī maḳhmūr nahīñ

husn hī husn hai jis samt uThātā huuñ nazar

ab yahāñ tuur nahīñ barq-e-sar-e-tūr nahīñ

dekh saktā huuñ jo āñkhoñ se vo kaafī hai 'majāz'

ahl-e-irfāñ kī navāzish mujhe manzūr nahīñ

wo naqab aap se uTh jae to kuchh dur nahin

warna meri nigah-e-shauq bhi majbur nahin

KHatir-e-ahl-e-nazar husn ko manzur nahin

is mein kuchh teri KHata dida-e-mahjur nahin

lakh chhupte ho magar chhup ke bhi mastur nahin

tum ajab chiz ho nazdik nahin dur nahin

jurat-e-arz pe wo kuchh nahin kahte lekin

har ada se ye Tapakta hai ki manzur nahin

dil dhaDak uThta hai KHud apni hi har aahaT par

ab qadam manzil-e-jaanan se bahut dur nahin

hae wo waqt ki jab be-piye mad-hoshi thi

hae ye waqt ki ab pi ke bhi maKHmur nahin

husn hi husn hai jis samt uThata hun nazar

ab yahan tur nahin barq-e-sar-e-tur nahin

dekh sakta hun jo aankhon se wo kafi hai 'majaz'

ahl-e-irfan ki nawazish mujhe manzur nahin