wo sun kar hur ki tarif parde se nikal aae

vo sun kar huur kī tārīf parde se nikal aa.e

kahā phir muskurā kar husn-e-zebā is ko kahte haiñ

ajal kā naam dushman dūsre ma.anī meñ letā hai

tumhāre chāhne vaale tamannā is ko kahte haiñ

mire madfan pe kyuuñ rote ho āshiq mar nahīñ saktā

ye mar jaanā nahīñ hai sabr aanā is ko kahte haiñ

namak bhar kar mire zaḳhmoñ meñ tum kyā muskurāte ho

mire zaḳhmoñ ko dekho muskurānā is ko kahte haiñ

zamāne se adāvat kā sabab thī dostī jin kī

ab un ko dushmanī hai ham se duniyā is ko kahte haiñ

dikhāte ham na ā.īna to ye kyuuñ kar nazar aatā

bashar hūroñ se achchhā tum ne dekhā is ko kahte haiñ

wo sun kar hur ki tarif parde se nikal aae

kaha phir muskura kar husn-e-zeba is ko kahte hain

ajal ka nam dushman dusre mani mein leta hai

tumhaare chahne wale tamanna is ko kahte hain

mere madfan pe kyun rote ho aashiq mar nahin sakta

ye mar jaana nahin hai sabr aana is ko kahte hain

namak bhar kar mere zaKHmon mein tum kya muskuraate ho

mere zaKHmon ko dekho muskurana is ko kahte hain

zamane se adawat ka sabab thi dosti jin ki

ab un ko dushmani hai hum se duniya is ko kahte hain

dikhate hum na aaina to ye kyun kar nazar aata

bashar huron se achchha tum ne dekha is ko kahte hain