yahan to qafile bhar ko akela chhoD dete hain

yahāñ to qāfile bhar ko akelā chhoḌ dete haiñ

sabhī chalte hoñ jis par ham vo rasta chhoḌ dete haiñ

qalam meñ zor jitnā hai judā.ī kī badaulat hai

milan ke ba.ad likhne vaale likhnā chhoḌ dete haiñ

kabhī sairāb kar jaatā hai ham ko abr kā manzar

kabhī sāvan baras kar bhī piyāsā chhoḌ dete haiñ

zamīñ ke mas.aloñ kā hal agar yuuñ hī nikaltā hai

to lo jī aaj se ham tum se milnā chhoḌ dete haiñ

mohazzab dost āḳhir ham se barham kyuuñ nahīñ hoñge

sag-e-iz.hār ko ham bhī to khullā chhoḌ dete haiñ

jo zinda ho use to maar dete haiñ jahāñ vaale

jo marnā chāhtā ho us ko zinda chhoḌ dete haiñ

mukammal ḳhud to ho jaate haiñ sab kirdār āḳhir meñ

magar kam-baḳht qaarī ko adhūrā chhoḌ dete haiñ

vo nañg-e-ādmi.yat hī sahī par ye batā ai dil

purāne dostoñ ko is tarah kyā chhoḌ dete haiñ

ye duniyā-dārī aur irfān kā daavā 'shujā-ḳhāvar'

miyāñ irfān ho jaa.e to duniyā chhoḌ dete haiñ

yahan to qafile bhar ko akela chhoD dete hain

sabhi chalte hon jis par hum wo rasta chhoD dete hain

qalam mein zor jitna hai judai ki badaulat hai

milan ke baad likhne wale likhna chhoD dete hain

kabhi sairab kar jata hai hum ko abr ka manzar

kabhi sawan baras kar bhi piyasa chhoD dete hain

zamin ke masalon ka hal agar yun hi nikalta hai

to lo ji aaj se hum tum se milna chhoD dete hain

mohazzab dost aaKHir hum se barham kyun nahin honge

sag-e-izhaar ko hum bhi to khulla chhoD dete hain

jo zinda ho use to mar dete hain jahan wale

jo marna chahta ho us ko zinda chhoD dete hain

mukammal KHud to ho jate hain sab kirdar aaKHir mein

magar kam-baKHt qari ko adhura chhoD dete hain

wo nang-e-admiyat hi sahi par ye bata ai dil

purane doston ko is tarah kya chhoD dete hain

ye duniya-dari aur irfan ka dawa 'shuja-KHawar'

miyan irfan ho jae to duniya chhoD dete hain