ye hasin log hain tu inki murawwat pe na ja

ye hasīñ log haiñ tū in kī muravvat pe na jā

ḳhud hī uTh baiTh kisī izn o ijāzat pe na jā

sūrat-e-sham.a tire sāmne raushan haiñ jo phuul

un kī kirnoñ meñ nahā zauq-e-samā.at pe na jā

dil sī check-bōk hai tire paas tujhe kyā dhaḌkā

jī ko bhā jaa.e to phir chiiz kī qīmat pe na jā

itnā kam-zarf na ban us ke bhī siine meñ hai dil

us kā ehsās bhī rakh apnī hī rāhat pe na jā

dekhtā kyā hai Thahar kar mirī jānib har roz

rauzan-e-dar huuñ mirī diid kī hairat pe na jā

tere dil-soḳhta baiThe haiñ sar-e-bām abhī

baal khole hue tāroñ bharī is chhat pe na jā

merī poshāk to pahchān nahīñ hai merī

dil meñ bhī jhāñk mirī zāhirī hālat pe na jā

ye hasin log hain tu in ki murawwat pe na ja

KHud hi uTh baiTh kisi izn o ijazat pe na ja

surat-e-shama tere samne raushan hain jo phul

un ki kirnon mein naha zauq-e-samaat pe na ja

dil si check-book hai tere pas tujhe kya dhaDka

ji ko bha jae to phir chiz ki qimat pe na ja

itna kam-zarf na ban us ke bhi sine mein hai dil

us ka ehsas bhi rakh apni hi rahat pe na ja

dekhta kya hai Thahar kar meri jaanib har roz

rauzan-e-dar hun meri did ki hairat pe na ja

tere dil-soKHta baiThe hain sar-e-baam abhi

baal khole hue taron bhari is chhat pe na ja

meri poshak to pahchan nahin hai meri

dil mein bhi jhank meri zahiri haalat pe na ja