ye hukm hai teri rahon mein dusra na mile

ye hukm hai tirī rāhoñ meñ dūsrā na mile

shamīm-e-jāñ tujhe pairāhan-e-sabā na mile

bujhī huī haiñ nigāheñ ġhubār hai ki dhuāñ

vo rāsta hai ki apnā bhī naqsh-e-pā na mile

jamāl-e-shab mire ḳhvāboñ kī raushnī tak hai

ḳhudā-na-karda charāġhoñ kī lau baḌhā na mile

qadam qadam mirī vīrāniyoñ ke rañg-mahal

diloñ ko zaḳhm kī sauġhāt-e-ḳhusravāna mile

tum is dayār meñ insāñ ko DhūñDhtī ho jahāñ

vafā mile to ba-ehsās-e-mujrimāna mile

ga.e dinoñ ke havāle se tum ko pahchānā

ham aaj ḳhud se mile aur vālihāna mile

kidhar se sañg chalā thā 'adā' kahāñ pahuñchā

jo ek Thes se TūTeñ unheñ bahā na mile

ye hukm hai teri rahon mein dusra na mile

shamim-e-jaan tujhe pairahan-e-saba na mile

bujhi hui hain nigahen ghubar hai ki dhuan

wo rasta hai ki apna bhi naqsh-e-pa na mile

jamal-e-shab mere KHwabon ki raushni tak hai

KHuda-na-karda charaghon ki lau baDha na mile

qadam qadam meri viraniyon ke rang-mahal

dilon ko zaKHm ki saughat-e-KHusrawana mile

tum is dayar mein insan ko DhunDhti ho jahan

wafa mile to ba-ehsas-e-mujrimana mile

gae dinon ke hawale se tum ko pahchana

hum aaj KHud se mile aur walihana mile

kidhar se sang chala tha 'ada' kahan pahuncha

jo ek Thes se TuTen unhen baha na mile