ye jo hasil hamein har shai ki farawani hai

ye jo hāsil hameñ har shai kī farāvānī hai

ye bhī to apnī jagah ek pareshānī hai

zindagī kā hī nahīñ Thor-Thikāna ma.alūm

maut to tai hai ki kis vaqt kahāñ aanī hai

koī kartā hī nahīñ zikr vafādārī kā

in dinoñ ishq meñ āsānī hī āsānī hai

kab ye sochā thā kabhī dost ki yuuñ bhī hogā

terī sūrat tirī āvāz se pahchānī hai

chain lene hī nahīñ detī kisī pal mujh ko

roz-e-avval se mire saath jo hairānī hai

ye bhī mumkin hai ki ābādī ho is se aage

ye jo tā-hadd-e-nazar phailtī vīrānī hai

kyuuñ sitāre haiñ kahīñ aur kahīñ aañsū haiñ

aañkh vāloñ ne yahī ramz nahīñ jaanī hai

taḳht se taḳhta bahut duur nahīñ hotā hai

bas yahī baat hameñ aap ko batlānī hai

dost kī bazm hī vo bazm hai 'amjad' ki jahāñ

aql ko saath meñ rakhnā baḌī nādānī hai

ye jo hasil hamein har shai ki farawani hai

ye bhi to apni jagah ek pareshani hai

zindagi ka hi nahin Thor-Thikana malum

maut to tai hai ki kis waqt kahan aani hai

koi karta hi nahin zikr wafadari ka

in dinon ishq mein aasani hi aasani hai

kab ye socha tha kabhi dost ki yun bhi hoga

teri surat teri aawaz se pahchani hai

chain lene hi nahin deti kisi pal mujh ko

roz-e-awwal se mere sath jo hairani hai

ye bhi mumkin hai ki aabaadi ho is se aage

ye jo ta-hadd-e-nazar phailti virani hai

kyun sitare hain kahin aur kahin aansu hain

aankh walon ne yahi ramz nahin jaani hai

taKHt se taKHta bahut dur nahin hota hai

bas yahi baat hamein aap ko batlani hai

dost ki bazm hi wo bazm hai 'amjad' ki jahan

aql ko sath mein rakhna baDi nadani hai