ye jo tanhai mili aankh mein dharne ke liye

ye jo tanhā.ī milī aañkh meñ dharne ke liye

is meñ ik dasht bhī hai mere guzarne ke liye

jam.a kartī hai mujhe raat bahut mushkil se

sub.h ko ghar se nikalte hī bikharne ke liye

paañv se lipTī milī saarī kī saarī ye zamīñ

ye falak puurā milā aañkh meñ dharne ke liye

aur phir karnā paḌā gosht ko nāḳhun se judā

ye zarūrī thā kisī zaḳhm ko bharne ke liye

thī vo ik tez havā ūñchā mujhe le aa.ī

ab zamīñ tañg sī lagtī hai utarne ke liye

baat kaisī bhī ho pal bhar kī nadāmat ke sivā

ḳharch aatā hai bhalā kitnā mukarne ke liye

aur phir aisā huā sāmne mere 'shāhīn'

jhuuT ke paañv nikal aa.e Thaharne ke liye

ye jo tanhai mili aankh mein dharne ke liye

is mein ek dasht bhi hai mere guzarne ke liye

jama karti hai mujhe raat bahut mushkil se

subh ko ghar se nikalte hi bikharne ke liye

panw se lipTi mili sari ki sari ye zamin

ye falak pura mila aankh mein dharne ke liye

aur phir karna paDa gosht ko naKHun se juda

ye zaruri tha kisi zaKHm ko bharne ke liye

thi wo ek tez hawa uncha mujhe le aai

ab zamin tang si lagti hai utarne ke liye

baat kaisi bhi ho pal bhar ki nadamat ke siwa

KHarch aata hai bhala kitna mukarne ke liye

aur phir aisa hua samne mere 'shahin'

jhuT ke panw nikal aae Thaharne ke liye