ye kaun kahta hai tu halqa-e-naqab mein aa?

ye kaun kahtā hai tū halqa-e-naqāb meñ aa?

shu.ūr-e-rañg-e-vafā ban ke āftāb meñ aa

fazā ko tū ne mo.attar kiyā to kyā hāsil?

mazā to jab hai ki phir lauT kar gulāb meñ aa

maiñ lafz lafz meñ tujh ko talāsh kartā huuñ

savāl meñ nahīñ aatā na aa javāb meñ aa

ghuTā ghuTā sā na rah tajraboñ ke mahbas meñ

sarīr-e-vaqt kī rāhoñ se tū kitāb meñ aa

jalā ke tāq-e-adam meñ masarratoñ ke charāġh

tū aarzū ke chamakte hue sarāb meñ aa

falak kī had se pare hai tirī uḌaan to kyaa?

magar kabhī kabhī dhartī ke is azaab meñ aa

nāniyat kā nasha ban ke chhā na mahfil par

utarnā hai to utar kar sharāb-e-nāb meñ aa

'karāmat' aaj zamāna jo de rahā hai daġhā

zarā sī baat pe hargiz na iztirāb meñ aa

ye kaun kahta hai tu halqa-e-naqab mein aa?

shuur-e-rang-e-wafa ban ke aaftab mein aa

faza ko tu ne moattar kiya to kya hasil?

maza to jab hai ki phir lauT kar gulab mein aa

main lafz lafz mein tujh ko talash karta hun

sawal mein nahin aata na aa jawab mein aa

ghuTa ghuTa sa na rah tajrabon ke mahbas mein

sarir-e-waqt ki rahon se tu kitab mein aa

jala ke taq-e-adam mein masarraton ke charagh

tu aarzu ke chamakte hue sarab mein aa

falak ki had se pare hai teri uDan to kya?

magar kabhi kabhi dharti ke is azab mein aa

naniyat ka nasha ban ke chha na mahfil par

utarna hai to utar kar sharab-e-nab mein aa

'karamat' aaj zamana jo de raha hai dagha

zara si baat pe hargiz na iztirab mein aa