ye sard raaten bhi ban kar abhi dhuan uD jaen

ye sard rāteñ bhī ban kar abhī dhuāñ uḌ jaa.eñ

vo ik lihāf maiñ oḌhūñ to sardiyāñ uḌ jaa.eñ

ḳhudā kā shukr ki merā makāñ salāmat hai

haiñ utnī tez havā.eñ ki bastiyāñ uḌ jaa.eñ

zamīñ se ek ta.alluq ne bāñdh rakkhā hai

badan meñ ḳhuun nahīñ ho to haDDiyāñ uḌ jaa.eñ

bikhar bikhar sī ga.ī hai kitāb sāñsoñ kī

ye kāġhzāt ḳhudā jaane kab kahāñ uḌ jaa.eñ

rahe ḳhayāl ki majzūb-e-ishq haiñ ham log

agar zamīn se phūñkeñ to āsmāñ uḌ jaa.eñ

havā.eñ baaz kahāñ aatī haiñ sharārat se

saroñ pe haath na rakkheñ to pagḌiyāñ uḌ jaa.eñ

bahut ġhurūr hai dariyā ko apne hone par

jo merī pyaas se uljhe to dhajjiyāñ uḌ jaa.eñ

ye sard raaten bhi ban kar abhi dhuan uD jaen

wo ek lihaf main oDhun to sardiyan uD jaen

KHuda ka shukr ki mera makan salamat hai

hain utni tez hawaen ki bastiyan uD jaen

zamin se ek talluq ne bandh rakkha hai

badan mein KHun nahin ho to haDDiyan uD jaen

bikhar bikhar si gai hai kitab sanson ki

ye kaghzat KHuda jaane kab kahan uD jaen

rahe KHayal ki majzub-e-ishq hain hum log

agar zamin se phunken to aasman uD jaen

hawaen baz kahan aati hain shararat se

saron pe hath na rakkhen to pagDiyan uD jaen

bahut ghurur hai dariya ko apne hone par

jo meri pyas se uljhe to dhajjiyan uD jaen