ye shab o roz jo ek be-kali rakkhi hui hai

ye shab o roz jo ik be-kalī rakkhī huī hai

jaane kis husn kī dīvāngī rakkhī huī hai

vo jo ik mauj-e-mohabbat tire ruḳh par jhalkī

aañkh meñ aaj bhī us kī namī rakkhī huī hai

vaqt detā hai jo pahchān to ye dekhtā hai

kis ne kis dard meñ dil kī ḳhushī rakkhī huī hai

aatī rahtī haiñ ajab aks o sadā kī lahreñ

mere hisse kī kahīñ shā.irī rakkhī huī hai

dasht kī chup se ubhartī haiñ sadā.eñ kyā kyā

bahr ke shor meñ kyā ḳhāmushī rakkhī huī hai

koī dhun hai pas-e-iz.hār safar meñ jis ne

merī ġhazloñ kī fazā aur sī rakkhī huī hai

kam kahā aur sujhāyā hai zyāda 'ālī'

ek ik satr meñ ik an-kahī rakkhī huī hai

ye shab o roz jo ek be-kali rakkhi hui hai

jaane kis husn ki diwangi rakkhi hui hai

wo jo ek mauj-e-mohabbat tere ruKH par jhalki

aankh mein aaj bhi us ki nami rakkhi hui hai

waqt deta hai jo pahchan to ye dekhta hai

kis ne kis dard mein dil ki KHushi rakkhi hui hai

aati rahti hain ajab aks o sada ki lahren

mere hisse ki kahin shairi rakkhi hui hai

dasht ki chup se ubharti hain sadaen kya kya

bahr ke shor mein kya KHamushi rakkhi hui hai

koi dhun hai pas-e-izhaar safar mein jis ne

meri ghazlon ki faza aur si rakkhi hui hai

kam kaha aur sujhaya hai zyaada 'ali'

ek ek satr mein ek an-kahi rakkhi hui hai