ye zamin kyon mujhe bhai mujhe malum nahin

ye zamīñ kyoñ mujhe bhaa.ī mujhe ma.alūm nahīñ

kyoñ ġhazal aur banā.ī mujhe ma.alūm nahīñ

ḳhud-baḳhud raah liye jaatī hai us kī jānib

ab kahāñ tak hai rasā.ī mujhe ma.alūm nahīñ

be-ḳhayālī meñ kisī saañp kī gardan pakḌī

yā kisī kī hai kalā.ī mujhe ma.alūm nahīñ

be-ḳhudī pūchh rahī hai ki hai kis kā ye sher

sher detā hai duhā.ī mujhe ma.alūm nahīñ

sard mausam mujhe kuchh aur bhī dahkātā hai

tāpnā aag parā.ī mujhe ma.alūm nahīñ

sīm-o-zar ḳhaam liye huuñ maiñ zamīñ kī sūrat

kaise hotī hai safā.ī mujhe ma.alūm nahīñ

maiñ ne ḳhud apne ḳhayāloñ meñ gaḌhā us kā jamāl

yā ḳhudā kī hai ḳhudā.ī mujhe ma.alūm nahīñ

aḳhz kartā huuñ maiñ ḳhud apnī jaḌoñ se paanī

dūsrī koī siñchā.ī mujhe ma.alūm nahīñ

gardish-e-charḳh meñ pastī-o-bulandī kaisī

farq-e-shāhī-o-gadā.ī mujhe ma.alūm nahīñ

ishq meñ kuudo agar shauq hai marne kā bahut

is se gahrī koī khaa.ī mujhe ma.alūm nahīñ

ye zamin kyon mujhe bhai mujhe malum nahin

kyon ghazal aur banai mujhe malum nahin

KHud-baKHud rah liye jati hai us ki jaanib

ab kahan tak hai rasai mujhe malum nahin

be-KHayali mein kisi sanp ki gardan pakDi

ya kisi ki hai kalai mujhe malum nahin

be-KHudi puchh rahi hai ki hai kis ka ye sher

sher deta hai duhai mujhe malum nahin

sard mausam mujhe kuchh aur bhi dahkata hai

tapna aag parai mujhe malum nahin

sim-o-zar KHam liye hun main zamin ki surat

kaise hoti hai safai mujhe malum nahin

main ne KHud apne KHayalon mein gaDha us ka jamal

ya KHuda ki hai KHudai mujhe malum nahin

aKHz karta hun main KHud apni jaDon se pani

dusri koi sinchai mujhe malum nahin

gardish-e-charKH mein pasti-o-bulandi kaisi

farq-e-shahi-o-gadai mujhe malum nahin

ishq mein kudo agar shauq hai marne ka bahut

is se gahri koi khai mujhe malum nahin