yun main sidha gaya wahshat mein bayaban ki taraf

yuuñ maiñ sīdhā gayā vahshat meñ bayābāñ kī taraf

haath jis tarah se aatā hai garebāñ kī taraf

baiThe baiThe dil-e-ġham-ghīñ ko ye kyā lahr aa.ī

uTh ke tūfān chalā dīda-e-giryāñ kī taraf

dekhnā lāla-e-ḳhud-rav kā lahaknā saaqī

koh se dauḌ ga.ī aag bayābāñ kī taraf

ro diyā dekh ke aksar maiñ bahār-e-shabnam

hañs diyā dekh ke aksar gul-e-ḳhandāñ kī taraf

baat chhuptī nahīñ paḌtī haiñ nigāheñ sab kī

us ke dāman kī taraf mere garebāñ kī taraf

saikḌoñ dāġh-e-gunah dho ga.e rahmat se tirī

kyā ghaTā jhuum ke aa.ī thī gulistāñ kī taraf

chashm-e-ā.īna pareshāñ-nazarī siikh ga.ī

dekhtā thā ye bahut zulf-e-pareshāñ kī taraf

sar jhukā.e hue hai 'nazm' basān-e-ḳhāma

samt sajde kī hai terī ḳhat-e-farmāñ kī taraf

yun main sidha gaya wahshat mein bayaban ki taraf

hath jis tarah se aata hai gareban ki taraf

baiThe baiThe dil-e-gham-ghin ko ye kya lahr aai

uTh ke tufan chala dida-e-giryan ki taraf

dekhna lala-e-KHud-raw ka lahakna saqi

koh se dauD gai aag bayaban ki taraf

ro diya dekh ke aksar main bahaar-e-shabnam

hans diya dekh ke aksar gul-e-KHandan ki taraf

baat chhupti nahin paDti hain nigahen sab ki

us ke daman ki taraf mere gareban ki taraf

saikDon dagh-e-gunah dho gae rahmat se teri

kya ghaTa jhum ke aai thi gulistan ki taraf

chashm-e-aina pareshan-nazari sikh gai

dekhta tha ye bahut zulf-e-pareshan ki taraf

sar jhukae hue hai 'nazm' basan-e-KHama

samt sajde ki hai teri KHat-e-farman ki taraf