yun tere husn ki taswir ghazal mein aae

yuuñ tire husn kī tasvīr ġhazal meñ aa.e

jaise bilqīs sulemāñ ke mahal meñ aa.e

jabr se ek huā zā.eqa-e-hijr-o-visāl

ab kahāñ se vo mazā sabr ke phal meñ aa.e

ye bhī ārā.ish-e-hastī kā taqāzā thā ki ham

halqa-e-fikr se maidān-e-amal meñ aa.e

har qadam dast-o-garebāñ hai yahāñ ḳhair se shar

ham bhī kis mārka-e-jañg-o-jadal meñ aa.e

zindagī jin ke tasavvur se jilā paatī thī

haa.e kyā log the jo dām-e-ajal meñ aa.e

yun tere husn ki taswir ghazal mein aae

jaise bilqis suleman ke mahal mein aae

jabr se ek hua zaeqa-e-hijr-o-visal

ab kahan se wo maza sabr ke phal mein aae

ye bhi aaraish-e-hasti ka taqaza tha ki hum

halqa-e-fikr se maidan-e-amal mein aae

har qadam dast-o-gareban hai yahan KHair se shar

hum bhi kis marka-e-jang-o-jadal mein aae

zindagi jin ke tasawwur se jila pati thi

hae kya log the jo dam-e-ajal mein aae