yunhi nahin hum bolte jate ye apni majburi hai

yūñhī nahīñ ham bolte jaate ye apnī majbūrī hai

jūñhī kuchh kah chukte haiñ lagtā hai baat adhūrī hai

sab apnī afvāh bane haiñ asl meñ kyā the bhuul ga.e

jiine kī jo sūrat hai so ye bhī aaj zarūrī hai

duniyā merī zindagī ke din kam kartī jaatī hai kyuuñ

ḳhuun pasīna ek kiyā hai ye merī mazdūrī hai

apne baad hī duniyā meñ Thahrāo jo aa.e to aa.e

jab tak ham zinda haiñ tab tak har ik daur ubūrī hai

DhūñD rahe haiñ kis ko log shikārī jaisī nazroñ se

saf-dar-saf maujūd huuñ maiñ to har ik saf to puurī hai

sab ik dūsre ko nazroñ se bas ye dilāsa dete haiñ

haiñ to ham sab paas hī bas andar kī ye ik duurī hai

itnī saarī āvāzoñ meñ shāyad sunñe vaale ko

bas itnā hī yaad rahegā merī baat zarūrī hai

koī bahānā mil jaa.e to haath nahīñ ham aane ke

der ye hai chal dene meñ tayyārī to puurī hai

'talḳh' hamāre hosh ke aalam kā hai rañg-e-suḳhan kuchh aur

jis par vajd meñ hai ik duniyā vo to ġhair-shu.ūrī hai

yunhi nahin hum bolte jate ye apni majburi hai

junhi kuchh kah chukte hain lagta hai baat adhuri hai

sab apni afwah bane hain asl mein kya the bhul gae

jine ki jo surat hai so ye bhi aaj zaruri hai

duniya meri zindagi ke din kam karti jati hai kyun

KHun pasina ek kiya hai ye meri mazduri hai

apne baad hi duniya mein Thahrao jo aae to aae

jab tak hum zinda hain tab tak har ek daur uburi hai

DhunD rahe hain kis ko log shikari jaisi nazron se

saf-dar-saf maujud hun main to har ek saf to puri hai

sab ek dusre ko nazron se bas ye dilasa dete hain

hain to hum sab pas hi bas andar ki ye ek duri hai

itni sari aawazon mein shayad sunne wale ko

bas itna hi yaad rahega meri baat zaruri hai

koi bahana mil jae to hath nahin hum aane ke

der ye hai chal dene mein tayyari to puri hai

'talKH' hamare hosh ke aalam ka hai rang-e-suKHan kuchh aur

jis par wajd mein hai ek duniya wo to ghair-shuuri hai