zaban ko hukm nigah-e-karam ko pahchane

zabāñ ko hukm nigāh-e-karam ko pahchāne

nigah kā jurm ġhubār-e-alam ko pahchāne

vo ek jaam kahāñ har kisī kī qismat meñ

vo ek zarf ki e.ajāz-e-sam ko pahchāne

matā-e-dard parakhnā to bas kī baat nahīñ

jo tujh ko dekh ke aa.e vo ham ko pahchāne

vo dil jo ḳhaak hue aaj tak dhaḌakte haiñ

rah-e-vafā tire mojiz-raqam ko pahchāne

sahar se pahle yahāñ āftāb ubhre haiñ

ḳhulūs bandgī-e-chashm-e-nam ko pahchāne

ye ḳhud-fareb ujāle ye haath haath diye

diye bujhāo ki insān ġham ko pahchāne

kisī ḳhayāl kā saaya kisī umiid kī dhuup

koī to aa.e ki dil kaif-o-kam ko pahchāne

hazār kos nigāhoñ se dil kī manzil tak

koī qarīb se dekhe to ham ko pahchāne

jo ham-safar bhī rahe haiñ sharīk-e-manzil bhī

kuchh ajnabī to na the phir bhī kam ko pahchāne

bahut dinoñ to havāoñ kā ham ne ruḳh dekhā

baḌe dinoñ meñ matā-e-qalam ko pahchāne

zaban ko hukm nigah-e-karam ko pahchane

nigah ka jurm ghubar-e-alam ko pahchane

wo ek jam kahan har kisi ki qismat mein

wo ek zarf ki eajaz-e-sam ko pahchane

mata-e-dard parakhna to bas ki baat nahin

jo tujh ko dekh ke aae wo hum ko pahchane

wo dil jo KHak hue aaj tak dhaDakte hain

rah-e-wafa tere mojiz-raqam ko pahchane

sahar se pahle yahan aaftab ubhre hain

KHulus bandgi-e-chashm-e-nam ko pahchane

ye KHud-fareb ujale ye hath hath diye

diye bujhao ki insan gham ko pahchane

kisi KHayal ka saya kisi umid ki dhup

koi to aae ki dil kaif-o-kam ko pahchane

hazar kos nigahon se dil ki manzil tak

koi qarib se dekhe to hum ko pahchane

jo ham-safar bhi rahe hain sharik-e-manzil bhi

kuchh ajnabi to na the phir bhi kam ko pahchane

bahut dinon to hawaon ka hum ne ruKH dekha

baDe dinon mein mata-e-qalam ko pahchane