zaKHm-e-furqat ko teri yaad ne bharne na diya

zaḳhm-e-furqat ko tirī yaad ne bharne na diyā

ġham-e-tanhā.ī magar ruḳh pe ubharne na diyā

aaj bhī naqsh haiñ dil par tirī aahaT ke nishāñ

ham ne us raah se auroñ ko guzarne na diyā

tū ne jis roz se chhoḌā ise ḳhālī rakkhā

maiñ ne ḳhushiyoñ ko bhī is dil meñ Thaharne na diyā

rabt jo tujh se banāyā so banā.e rakkhā

tū hī kyā terā tasavvur bhī bikharne na diyā

zabt itnā ki charāġhoñ se hue mahv-e-kalām

yaad itnī ki tujhe dil se utarne na diyā

aa.ine toḌ diye jo bhī nazar se guzre

kisī mah-rū ko tire ba.ad sañvarne na diyā

zaKHm-e-furqat ko teri yaad ne bharne na diya

gham-e-tanhai magar ruKH pe ubharne na diya

aaj bhi naqsh hain dil par teri aahaT ke nishan

hum ne us rah se auron ko guzarne na diya

tu ne jis roz se chhoDa ise KHali rakkha

main ne KHushiyon ko bhi is dil mein Thaharne na diya

rabt jo tujh se banaya so banae rakkha

tu hi kya tera tasawwur bhi bikharne na diya

zabt itna ki charaghon se hue mahw-e-kalam

yaad itni ki tujhe dil se utarne na diya

aaine toD diye jo bhi nazar se guzre

kisi mah-ru ko tere baad sanwarne na diya