zamin-e-zarafat

mire dil meñ achānak ye ḳhayāl aayā

zarāfat kī zamīñ banjar paḌī hai

maiñ is kī ābyārī kar ke dekhūñ

zarā nam ho to shāyad ye bahut zarḳhez ho jaa.e

ye merī arq-rezī se to kuchh nam ho ga.ī hai

ab is banjar zamīñ meñ ḳhvāh-maḳhvāh meñ

tabassum ke jo thoḌe biij bo.e jā rahā huuñ

kal in meñ se hañsī kī

nannhī koñpleñ hans hans ke phūTeñgī

phir in hī koñpaloñ meñ

qahqahoñ ke phuul ā.eñge

kuchh aise phuul bhī the

jo khilā karte the pahle bhī

magar vāqif na the

ḳhud apnī bhīnī bhīnī ḳhushbū se

salīqa siikh jā.egī havā bhī dhīre dhīre

ki kaise chūmte haiñ

adh-khilī kaliyoñ ko phūloñ ko

chaman meñ bulbuloñ kā aur bhañvaroñ hī kā raaj hogā

ijāzat hī na hogī dāḳhle kī tab bagūloñ ko

chalegī jab havā sher-o-suḳhan kī

hañsī aur qahqahoñ ke phuul apne sar hilā kar

kuchh is andāz se vo daad deñge ahl-e-fan ko

fazā meñ bhīnī bhīnī un kī ḳhushbū phail jā.egī

aur is tarah zarāfat kī vahī banjar zamīñ bhī

ik hañste khilkhilāte aur ḳhushbū se mo.attar

sarāsar ḳhitta-e-sarsabz-o-shādāb ban kar

dukhī āzurda-ḳhātir ġham ke māroñ ko

hañsī aur qahqahoñ kī ne.amatoñ se

sab ko mālā-māl kar degī

isī tarah jahāñ tak ho sakegā

masarrat aur ḳhushī ke giit naġhme

milā kar un ke sur meñ apnā sur gā.uñgā maiñ bhī

savāb-e-jāriya pā.ūñgā maiñ bhī

mere dil mein achanak ye KHayal aaya

zarafat ki zamin banjar paDi hai

main is ki aabyari kar ke dekhun

zara nam ho to shayad ye bahut zarKHez ho jae

ye meri arq-rezi se to kuchh nam ho gai hai

ab is banjar zamin mein KHwah-maKHwah mein

tabassum ke jo thoDe bij boe ja raha hun

kal in mein se hansi ki

nannhi konplen hans hans ke phuTengi

phir in hi konpalon mein

qahqahon ke phul aaenge

kuchh aise phul bhi the

jo khila karte the pahle bhi

magar waqif na the

KHud apni bhini bhini KHushbu se

saliqa sikh jaegi hawa bhi dhire dhire

ki kaise chumte hain

adh-khili kaliyon ko phulon ko

chaman mein bulbulon ka aur bhanwaron hi ka raj hoga

ijazat hi na hogi daKHle ki tab bagulon ko

chalegi jab hawa sher-o-suKHan ki

hansi aur qahqahon ke phul apne sar hila kar

kuchh is andaz se wo dad denge ahl-e-fan ko

faza mein bhini bhini un ki KHushbu phail jaegi

aur is tarah zarafat ki wahi banjar zamin bhi

ek hanste khilkhilate aur KHushbu se moattar

sarasar KHitta-e-sarsabz-o-shadab ban kar

dukhi aazurda-KHatir gham ke maron ko

hansi aur qahqahon ki neamaton se

sab ko mala-mal kar degi

isi tarah jahan tak ho sakega

masarrat aur KHushi ke git naghme

mila kar un ke sur mein apna sur gaunga main bhi

sawab-e-jariya paunga main bhi