zanjir-e-pa se aahan-e-shamshir hai talab

zanjīr-e-pā se āhan-e-shamshīr hai talab

shāyad tirī galī meñ na pahuñche ye shor ab

āḳhir jhalak uThī vo garebāñ ke chaak se

jis intizār-e-sub.h meñ guzrī thī merī shab

yaad aa.ī dil ko tere dar-e-nīm-vā kī raat

rukne lage qadam jo sar-e-rāh be-sabab

ye shān-e-dilbarī hai ki vo jab bhī mil gayā

paayā mizāj-e-dost ko āsūda-e-tarab

is tāza-dam havā meñ mire māh-e-nīm-māh

us baam se judā na kabhī ho tulū-e-shab

āñkheñ to khol daur-e-taġhayyur hai ham-nashīñ

kuchh khiḌkiyāñ to khol ga.ī hai havā-e-shab

chalne ko hai havā-e-gul-o-lāla kī jagah

ik naqb sī lagātī huī sarsar-e-aqab

āñkhoñ pe ek jādū-e-zulmat sā chhā gayā

haul-e-āfrīñ hayyūloñ ke jumbish meñ aa.e lab

kāzib sahāfatoñ kī bujhī raakh ke tale

jhulsā huā milegā varaq-dar-varaq adab

duniyā badal ga.ī hai hisāb aur ho ga.e

ramz-e-taġhayyur-e-ruḳh-e-ālam hue haiñ sab

sadiyoñ meñ jā ke bantā hai āḳhir mizāj-e-dahr

'madnī' koī taġhayyur-e-ālam hai be-sabab

zanjir-e-pa se aahan-e-shamshir hai talab

shayad teri gali mein na pahunche ye shor ab

aaKHir jhalak uThi wo gareban ke chaak se

jis intizar-e-subh mein guzri thi meri shab

yaad aai dil ko tere dar-e-nim-wa ki raat

rukne lage qadam jo sar-e-rah be-sabab

ye shan-e-dilbari hai ki wo jab bhi mil gaya

paya mizaj-e-dost ko aasuda-e-tarab

is taza-dam hawa mein mere mah-e-nim-mah

us baam se juda na kabhi ho tulu-e-shab

aankhen to khol daur-e-taghayyur hai ham-nashin

kuchh khiDkiyan to khol gai hai hawa-e-shab

chalne ko hai hawa-e-gul-o-lala ki jagah

ek naqb si lagati hui sarsar-e-aqab

aankhon pe ek jadu-e-zulmat sa chha gaya

haul-e-afrin hayyulon ke jumbish mein aae lab

kazib sahafaton ki bujhi rakh ke tale

jhulsa hua milega waraq-dar-waraq adab

duniya badal gai hai hisab aur ho gae

ramz-e-taghayyur-e-ruKH-e-alam hue hain sab

sadiyon mein ja ke banta hai aaKHir mizaj-e-dahr

'madni' koi taghayyur-e-alam hai be-sabab