zikr-e-shab-e-firaq se wahshat use bhi thi

zikr-e-shab-e-firāq se vahshat use bhī thī

merī tarah kisī se mohabbat use bhī thī

mujh ko bhī shauq thā na.e chehroñ kī diid kā

rasta badal ke chalne kī aadat use bhī thī

us raat der tak vo rahā mahv-e-guftugū

masrūf maiñ bhī kam thā farāġhat use bhī thī

mujh se bichhaḌ ke shahr meñ ghul-mil gayā vo shaḳhs

hālāñki shahr-bhar se adāvat use bhī thī

vo mujh se baḌh ke zabt kā aadī thā jī gayā

varna har ek saañs qayāmat use bhī thī

suntā thā vo bhī sab se purānī kahāniyāñ

shāyad rafāqatoñ kī zarūrat use bhī thī

tanhā huā safar meñ to mujh pe khulā ye bhed

saa.e se pyaar dhuup se nafrat use bhī thī

'mohsin' maiñ us se kah na sakā yuuñ bhī haal dil

darpesh ek taaza musībat use bhī thī

zikr-e-shab-e-firaq se wahshat use bhi thi

meri tarah kisi se mohabbat use bhi thi

mujh ko bhi shauq tha nae chehron ki did ka

rasta badal ke chalne ki aadat use bhi thi

us raat der tak wo raha mahw-e-guftugu

masruf main bhi kam tha faraghat use bhi thi

mujh se bichhaD ke shahr mein ghul-mil gaya wo shaKHs

haalanki shahr-bhar se adawat use bhi thi

wo mujh se baDh ke zabt ka aadi tha ji gaya

warna har ek sans qayamat use bhi thi

sunta tha wo bhi sab se purani kahaniyan

shayad rafaqaton ki zarurat use bhi thi

tanha hua safar mein to mujh pe khula ye bhed

sae se pyar dhup se nafrat use bhi thi

'mohsin' main us se kah na saka yun bhi haal dil

darpesh ek taza musibat use bhi thi