zindagi kawish-e-baatil hai mera sath na chhoD

zindagī kāvish-e-bātil hai mirā saath na chhoḌ

tū hī ik umr kā hāsil hai mirā saath na chhoḌ

log milte haiñ sar-e-rāh guzar jaate haiñ

tū hī ik ham-safar-e-dil hai mirā saath na chhoḌ

tū ne sochā hai mujhe tū ne sañvārā hai mujhe

tū mirā zehn mirā dil hai mirā saath na chhoḌ

tū na hogā to kahāñ jā ke jalūñgā shab bhar

tujh se hī garmi-e-mahfil hai mirā saath na chhoḌ

maiñ ki biphre hue tūfāñ meñ huuñ lahroñ lahroñ

tū ki āsūda-e-sāhil hai mirā saath na chhoḌ

is rifāqat ko sipar apnī banā leñ jī leñ

shahr kā shahr hī qātil hai mirā saath na chhoḌ

ek maiñ ne hī ugaa.e nahīñ ḳhvāboñ ke gulāb

tū bhī is jurm meñ shāmil hai mirā saath na chhoḌ

ab kisī raah pe jalte nahīñ chāhat ke charāg

tū mirī āḳhirī manzil hai mirā saath na chhoḌ

zindagi kawish-e-baatil hai mera sath na chhoD

tu hi ek umr ka hasil hai mera sath na chhoD

log milte hain sar-e-rah guzar jate hain

tu hi ek ham-safar-e-dil hai mera sath na chhoD

tu ne socha hai mujhe tu ne sanwara hai mujhe

tu mera zehn mera dil hai mera sath na chhoD

tu na hoga to kahan ja ke jalunga shab bhar

tujh se hi garmi-e-mahfil hai mera sath na chhoD

main ki biphre hue tufan mein hun lahron lahron

tu ki aasuda-e-sahil hai mera sath na chhoD

is rifaqat ko sipar apni bana len ji len

shahr ka shahr hi qatil hai mera sath na chhoD

ek main ne hi ugae nahin KHwabon ke gulab

tu bhi is jurm mein shamil hai mera sath na chhoD

ab kisi rah pe jalte nahin chahat ke charag

tu meri aaKHiri manzil hai mera sath na chhoD