zindagi tu ne lahu le ke diya kuchh bhi nahin

zindagī tū ne lahū le ke diyā kuchh bhī nahīñ

tere dāman meñ mire vāste kyā kuchh bhī nahīñ

aap in hāthoñ kī chāheñ to talāshī le leñ

mere hāthoñ meñ lakīroñ ke sivā kuchh bhī nahīñ

ham ne dekhā hai ka.ī aise ḳhudāoñ ko yahāñ

sāmne jin ke vo sach-much kā ḳhudā kuchh bhī nahīñ

yā ḳhudā ab ke ye kis rañg meñ aa.ī hai bahār

zard hī zard hai peḌoñ pe harā kuchh bhī nahīñ

dil bhī ik zid pe aḌā hai kisī bachche kī tarah

yā to sab kuchh hī ise chāhiye yā kuchh bhī nahīñ

zindagi tu ne lahu le ke diya kuchh bhi nahin

tere daman mein mere waste kya kuchh bhi nahin

aap in hathon ki chahen to talashi le len

mere hathon mein lakiron ke siwa kuchh bhi nahin

hum ne dekha hai kai aise KHudaon ko yahan

samne jin ke wo sach-much ka KHuda kuchh bhi nahin

ya KHuda ab ke ye kis rang mein aai hai bahaar

zard hi zard hai peDon pe hara kuchh bhi nahin

dil bhi ek zid pe aDa hai kisi bachche ki tarah

ya to sab kuchh hi ise chahiye ya kuchh bhi nahin