tumhaare panw ke niche koi zamin nahin

tumhāre paañv ke nīche koī zamīn nahīñ

kamāl ye hai ki phir bhī tumheñ yaqīn nahīñ

maiñ be-panāh añdheroñ ko sub.h kaise kahūñ

maiñ in nazāroñ kā andhā tamāshbīn nahīñ

tirī zabān hai jhūTī jamhūriyat kī tarah

tū ik zalīl sī gaalī se behtarīn nahīñ

tumhīñ se pyaar jatā.eñ tumhīñ ko khā jaa.eñ

adiib yuuñ to siyāsī haiñ par kamīn nahīñ

tujhe qasam hai ḳhudī ko bahut halāk na kar

tū is machine kā purza hai tū machine nahīñ

bahut mash.hūr hai aa.eñ zarūr aap yahāñ

ye mulk dekhne laa.eq to hai hasīn nahīñ

zarā sā taur-tarīqoñ meñ her-pher karo

tumhāre haath meñ collar ho āstīn nahīñ

tumhaare panw ke niche koi zamin nahin

kamal ye hai ki phir bhi tumhein yaqin nahin

main be-panah andheron ko subh kaise kahun

main in nazaron ka andha tamashbin nahin

teri zaban hai jhuTi jamhuriyat ki tarah

tu ek zalil si gali se behtarin nahin

tumhin se pyar jataen tumhin ko kha jaen

adib yun to siyasi hain par kamin nahin

tujhe qasam hai KHudi ko bahut halak na kar

tu is machine ka purza hai tu machine nahin

bahut mashhur hai aaen zarur aap yahan

ye mulk dekhne laeq to hai hasin nahin

zara sa taur-tariqon mein her-pher karo

tumhaare hath mein collar ho aastin nahin