KHud-kushi

rahīmullāh huā achchhā to us ne

ye dekhā ho chukī hai partition

ga.e kuchh bhaag aur kuchh mar chuke haiñ

na netā-singh baaqī hai na bhīshan

sune is dāstāñ ke jab fasāne

to ġhusse ne banāyā us ko majnūñ

taḌap uTThā ki le kaise vo badla

piye in kāfiroñ kā kis tarah ḳhuuñ

na kyuuñ kahlā sakā vo mard-e-ġhāzī

vo is ġham meñ ka.ī rāteñ na soyā

shahādat hī kā rutba us ko miltā

na jab ye mil sakā vo ḳhuub royā

yakā-yak us ke sab palTe ḳhayālāt

to us ne dāman-e-islām chhoḌā

kināra-kash huā sab bhā.iyoñ se

na.e maz.hab se rishta apnā joḌā

ka.ī din baa'd jab niklā vo ghar se

to us ke muñh pe dāḌhī sar pe the baal

nihālā-singh ab thā naam us kā

liye kirpān vo ġhusse se thā laal

hazāroñ ḳhūñ-fishāñ armān le ke

khaḌā thā aaj vo masjid ke aage

pakaḌne ke liye us ko namāzī

namāzeñ chhoḌ kar masjid se bhāge

lagā kar ek na.ara vahshat-ālūd

vahī kirpān jhaT us ne nikālī

lagā kar qahqaha us ne ye kirpān

ma.an siine meñ apne ghoñp Daalī

nikālā phir use siine se bāhar

gale par zor se us ko phirāyā

aur apne jāñ-ba-haq hone se pahle

bayāñ apnā ye ruk ruk kar sunāyā

tamannā thī ki ik sikh maiñ bhī mārūñ

ye puurī tū ne kī allāh-ta.ālā

bahut ḳhush huuñ rahīmullāh-ḳhāñ ne

nihālā-singh-jī ko maar Daalā

rahimullah hua achchha to us ne

ye dekha ho chuki hai partition

gae kuchh bhag aur kuchh mar chuke hain

na neta-singh baqi hai na bhishan

sune is dastan ke jab fasane

to ghusse ne banaya us ko majnun

taDap uTTha ki le kaise wo badla

piye in kafiron ka kis tarah KHun

na kyun kahla saka wo mard-e-ghazi

wo is gham mein kai raaten na soya

shahadat hi ka rutba us ko milta

na jab ye mil saka wo KHub roya

yaka-yak us ke sab palTe KHayalat

to us ne daman-e-islam chhoDa

kinara-kash hua sab bhaiyon se

nae mazhab se rishta apna joDa

kai din ba'd jab nikla wo ghar se

to us ke munh pe daDhi sar pe the baal

nihaala-singh ab tha nam us ka

liye kirpan wo ghusse se tha lal

hazaron KHun-fishan arman le ke

khaDa tha aaj wo masjid ke aage

pakaDne ke liye us ko namazi

namazen chhoD kar masjid se bhage

laga kar ek nara wahshat-alud

wahi kirpan jhaT us ne nikali

laga kar qahqaha us ne ye kirpan

man sine mein apne ghonp Dali

nikala phir use sine se bahar

gale par zor se us ko phiraya

aur apne jaan-ba-haq hone se pahle

bayan apna ye ruk ruk kar sunaya

tamanna thi ki ek sikh main bhi marun

ye puri tu ne ki allah-taala

bahut KHush hun rahimullah-KHan ne

nihaala-singh-ji ko mar Dala