aankhen

laḌāo har kisī se yuuñ na tum be-sāḳhta āñkheñ

kahīñ badnām na ho jaa.eñ shorat-yāfata āñkheñ

muravvat rahm aur sharm-o-hayā un meñ nahīñ hotī

dikhāne ke liye hotī haiñ jo ḳhud-sāḳhta āñkheñ

kabhī ḳhud band ho kar rāh-e-dil masdūd kartī haiñ

kabhī detī chalī jaatī haiñ dil tak rāsta āñkheñ

kahīñ fitnagarī se haiñ sukūn-o-chain kī dushman

kahīñ amn-o-amāñ kī haiñ nishānī fāḳhta āñkheñ

kabhī dil bhī taḌaptā hai duhā.ī de ke āñkhoñ kī

kabhī ro ro ke de jaatī haiñ dil kā vāsta āñkheñ

nahīñ tāb-e-nazāra aur jalvoñ kī tamannā hai

kahīñ andhī na ho jaa.eñ ḳhudā-na-ḳhvāsta āñkheñ

chalā kuchh bhī na merā zor jab apnī hī biivī par

dikhātā rah gayā meñ ho ke dil-bardashta āñkheñ

nazar lagne kā Dar thā is liye bhī 'ḳhvāh-maḳhvāh' maiñ ne

haTā leñ un ke ruḳh se bā-dil-e-na-ḳhvāsta āñkheñ

hasīnoñ se nigāheñ 'ḳhvāh-maḳhvāh' tum kyuuñ laḌāte ho

kahīñ kamzor na ho jaa.eñ pension-yāfta āñkheñ

laDao har kisi se yun na tum be-saKHta aankhen

kahin badnam na ho jaen shorat-yafata aankhen

murawwat rahm aur sharm-o-haya un mein nahin hoti

dikhane ke liye hoti hain jo KHud-saKHta aankhen

kabhi KHud band ho kar rah-e-dil masdud karti hain

kabhi deti chali jati hain dil tak rasta aankhen

kahin fitnagari se hain sukun-o-chain ki dushman

kahin amn-o-aman ki hain nishani faKHta aankhen

kabhi dil bhi taDapta hai duhai de ke aankhon ki

kabhi ro ro ke de jati hain dil ka wasta aankhen

nahin tab-e-nazara aur jalwon ki tamanna hai

kahin andhi na ho jaen KHuda-na-KHwasta aankhen

chala kuchh bhi na mera zor jab apni hi biwi par

dikhata rah gaya mein ho ke dil-bardashta aankhen

nazar lagne ka Dar tha is liye bhi 'KHwah-maKHwah' main ne

haTa len un ke ruKH se ba-dil-e-na-KHwasta aankhen

hasinon se nigahen 'KHwah-maKHwah' tum kyun laDate ho

kahin kamzor na ho jaen pension-yafta aankhen