wo meri DeDh aankhon se kya kya dikhai de

vo merī DeḌh āñkhoñ se kyā kyā dikhā.ī de

sīdhā dikhā.ī de ki jo ulTā dikhā.ī de

patlūn hai ġharāra to jampar bhī hai qamīz

fashion kā rang aur bhī chaḌhtā dikhā.ī de

ab sar par oḌhnī hai na hāthoñ meñ chūḌiyāñ

laḌkī bhī āj-kal mujhe laḌkā dikhā.ī de

hero kabhī jo chheḌ de college kī girl ko

college ke gate par hī vo piTtā dikhā.ī de

chashma bhī chashm-e-nāz pe shāyad hai is liye

chechak-zada ho chehra to achchhā dikhā.ī de

jiddat kā hai kamāl ki shā'ir ko āj-kal

sūraj ko choñch meñ liye murġhā dikhā.ī de

jaise adab kī bazm bhī bāzār-e-she'r ho

shā'ir ġharīb vaah pe biktā dikhā.ī de

is daur kī hai den ki kursī pe āj-kal

āñkhoñ kā andhā gāñTh kā puurā dikhā.ī de

kaise karegā koī zarūrat kī guftugū

netā ke saath saath jo chamcha dikhā.ī de

patlūn das hī rūpye kā begam ko hai girāñ

saayā magar pachās kā sastā dikhā.ī de

shā'ir mushā'ire meñ paḌhe jam ke kis tarah

chehre se jab vo raat kā bhūkā dikhā.ī de

shā'ir ġharīb kā hai 'ajab haal bazm meñ

hōting kā hamla ho to akelā dikhā.ī de

pahchān bhī libās se dushvār ho ga.ī

saalī bhī ab libās meñ saalā dikhā.ī de

ham ne ye lāTrī kī ticket kyā ḳharīd lī

har raat ek laakh kā sapnā dikhā.ī de

masjid kā hogā vo to mo.azzin ki pesh-imām

tanhā khaḌā namāz jo paḌhtā dikhā.ī de

suunī paḌī haiñ masjideñ lekin mazār par

har jum'e jum’erāt ko mela dikhā.ī de

'jauhar' kā har kalām tabassum-navāz hai

rotā huā jo aa.e vo hañstā dikhā.ī de

wo meri DeDh aankhon se kya kya dikhai de

sidha dikhai de ki jo ulTa dikhai de

patlun hai gharara to jampar bhi hai qamiz

fashion ka rang aur bhi chaDhta dikhai de

ab sar par oDhni hai na hathon mein chuDiyan

laDki bhi aaj-kal mujhe laDka dikhai de

hero kabhi jo chheD de college ki girl ko

college ke gate par hi wo piTta dikhai de

chashma bhi chashm-e-naz pe shayad hai is liye

chechak-zada ho chehra to achchha dikhai de

jiddat ka hai kamal ki sha'ir ko aaj-kal

suraj ko chonch mein liye murgha dikhai de

jaise adab ki bazm bhi bazar-e-she'r ho

sha'ir gharib wah pe bikta dikhai de

is daur ki hai den ki kursi pe aaj-kal

aankhon ka andha ganTh ka pura dikhai de

kaise karega koi zarurat ki guftugu

neta ke sath sath jo chamcha dikhai de

patlun das hi rupye ka begam ko hai giran

saya magar pachas ka sasta dikhai de

sha'ir musha'ire mein paDhe jam ke kis tarah

chehre se jab wo raat ka bhuka dikhai de

sha'ir gharib ka hai 'ajab haal bazm mein

hooting ka hamla ho to akela dikhai de

pahchan bhi libas se dushwar ho gai

sali bhi ab libas mein sala dikhai de

hum ne ye laTri ki ticket kya KHarid li

har raat ek lakh ka sapna dikhai de

masjid ka hoga wo to moazzin ki pesh-imam

tanha khaDa namaz jo paDhta dikhai de

suni paDi hain masjiden lekin mazar par

har jum'e jum’eraat ko mela dikhai de

'jauhar' ka har kalam tabassum-nawaz hai

rota hua jo aae wo hansta dikhai de