bambai

visky o solan kā ābā.ī vatan hai bamba.ī

landon-o-pairis kī sautelī bahan hai bamba.ī

muḳhtalif dūlhe haiñ jis ke vo dul.han hai bamba.ī

film o 'ilm o 'ishq kī ek anjuman hai bamba.ī

bamba.ī jis ne basāyā vo baḌā ustād thā

world kā juġhrāfiya us ko zabānī yaad thā

bamba.ī meñ 'ishq farmānā bahut āsān hai

is tijārat meñ munāfa' kā bahut imkān hai

'ishq vāloñ kā yahāñ maidān hī maidān hai

bamba.ī kā bachcha bachcha māhir-e-rūmān hai

dīd-e-avval vasl kā paiġhām hotī hai yahāñ

husn kī doshīzgī nīlām hotī hai yahāñ

tājirāna 'ishq yaañ kā ḳhaas etiquette hai

yaañ agar 'āshiq hai moTā 'ishq meñ bhī weight hai

yaañ sabhī bhūke haiñ lekin apnā apnā peT hai

apnā apnā market hai apnā apnā rate hai

shaiḳh jī bakte raheñ aisā hai vaisā hai ḳhudā

bamba.ī vaale ye farmāte haiñ paisa hai ḳhudā

'ishq ke maidāñ meñ yaañ ghoḌe bhī haiñ sā.īs bhī

'aql kī mahfil meñ yaañ jibrīl bhī iblīs bhī

husn ke bāzār meñ yaañ thaan bhī kaTpīs bhī

chaar sau bīsiyoñ ke leader aaTh sau chālīs bhī

kyā batā.ūñ meñ tumheñ is shahr kā juġhrāfiya

bamba.ī hai ik ġhazal gaḌ-baḌ hai jis kā qāfiya

husn yaañ hans hans ke kahtā hai ki maiḳhāne meñ chal

'ishq kahtā hai ki miss chhammo ke kāshāne meñ chalī

vahshat-e-dil kā taqāzā hai ki vīrāne meñ chalī

aur police kahtī hai mere saath aa thāne meñ chal

jeb kahtī hai abe ullū yahāñ se bhaag jagā

yā badāyūñ kā ticket le yā sū-e-prayāg jā

dil ko bahlāne yahāñ tum khel meñ jaao to rush

central se bandra tak rail meñ jaao to rush

chhoḌ kar jantā ko puna mail meñ jaao to rush

qaum kī ḳhidmat ke badle jail meñ jaao to rush

hai yahāñ ye hukm har majbūr o bekas ke liye

subah se line lagā do shaam kī bus ke liye

hai yahāñ ik marhala aisā jo sar hotā nahīñ

yā'nī ghar vaalī to ho jaatī hai ghar hotā nahīñ

baam hotā hai agar ghar meñ to dar hotā nahīñ

yā'nī ghar mā'lūm hotā hai magar hotā nahīñ

ek shauhar ek begam ek bhāvaj ek nand

be-takalluf ek hī kholī meñ ho jaate haiñ band

guftugū meñ bhī yahāñ ik ḳhaas andāz-e-'avām

kal kisī se kah rahe the ik buzurg-e-nek-nām

ham to shālā roz tum shāle ko kartā hai shalām

aur tum shālā kabhī kartā nahīñ ham she shalām

ham brobar baat kartā hai apun jhūTā nahīñ

tum to banDal pheñktā hai maal abhī chhūTā nahīñ

bamba.ī meñ saikḌoñ 'ilmī o filmī shaḳhsiyāt

vo editor jin ke hāthoñ meñ nizām-e-kā.enāt

vo producer ki jin ke jaam meñ āb-e-hayāt

aur vo shā'ir ki jin kī shāḳh-e-āhū par barāt

yaañ dilip o raaj haiñ naushād o mahmūd o latā

in se milnā ho to pahle bhuul jā apnā pata

bamba.ī meñ 'aam hai har jins-e-behtar kā black

aarzū kā vaqt kā sangam kā leader kā black

yaañ shakīl o sāhir o majrūh o aḳhtar kā black

jā'frī to jā'frī Thahre muzaffar kā black

dekh kar is shahr ke andāz dil hairān hai

bamba.ī kaahe ko hai puurā jamālistān hai

wisky o solan ka aabai watan hai bambai

landon-o-pairis ki sauteli bahan hai bambai

muKHtalif dulhe hain jis ke wo dulhan hai bambai

film o 'ilm o 'ishq ki ek anjuman hai bambai

bambai jis ne basaya wo baDa ustad tha

world ka jughrafiya us ko zabani yaad tha

bambai mein 'ishq farmana bahut aasan hai

is tijarat mein munafa' ka bahut imkan hai

'ishq walon ka yahan maidan hi maidan hai

bambai ka bachcha bachcha mahir-e-ruman hai

did-e-awwal wasl ka paigham hoti hai yahan

husn ki doshizgi nilam hoti hai yahan

tajirana 'ishq yan ka KHas etiquette hai

yan agar 'ashiq hai moTa 'ishq mein bhi weight hai

yan sabhi bhuke hain lekin apna apna peT hai

apna apna market hai apna apna rate hai

shaiKH ji bakte rahen aisa hai waisa hai KHuda

bambai wale ye farmate hain paisa hai KHuda

'ishq ke maidan mein yan ghoDe bhi hain sais bhi

'aql ki mahfil mein yan jibril bhi iblis bhi

husn ke bazar mein yan than bhi kaTpis bhi

chaar sau bisiyon ke leader aaTh sau chaalis bhi

kya bataun mein tumhein is shahr ka jughrafiya

bambai hai ek ghazal gaD-baD hai jis ka qafiya

husn yan hans hans ke kahta hai ki maiKHane mein chal

'ishq kahta hai ki miss chhammo ke kashane mein chali

wahshat-e-dil ka taqaza hai ki virane mein chali

aur police kahti hai mere sath aa thane mein chal

jeb kahti hai abe ullu yahan se bhag jaga

ya badayun ka ticket le ya su-e-prayag ja

dil ko bahlane yahan tum khel mein jao to rush

central se bandra tak rail mein jao to rush

chhoD kar janta ko puna mail mein jao to rush

qaum ki KHidmat ke badle jail mein jao to rush

hai yahan ye hukm har majbur o bekas ke liye

subah se line laga do sham ki bus ke liye

hai yahan ek marhala aisa jo sar hota nahin

ya'ni ghar wali to ho jati hai ghar hota nahin

baam hota hai agar ghar mein to dar hota nahin

ya'ni ghar ma'lum hota hai magar hota nahin

ek shauhar ek begam ek bhawaj ek nand

be-takalluf ek hi kholi mein ho jate hain band

guftugu mein bhi yahan ek KHas andaz-e-'awam

kal kisi se kah rahe the ek buzurg-e-nek-nam

hum to shaala roz tum shaale ko karta hai shalam

aur tum shaala kabhi karta nahin hum she shalam

hum brobar baat karta hai apun jhuTa nahin

tum to banDal phenkta hai mal abhi chhuTa nahin

bambai mein saikDon 'ilmi o filmi shaKHsiyat

wo editor jin ke hathon mein nizam-e-kaenat

wo producer ki jin ke jam mein aab-e-hayat

aur wo sha'ir ki jin ki shaKH-e-ahu par baraat

yan dilip o raj hain naushad o mahmud o lata

in se milna ho to pahle bhul ja apna pata

bambai mein 'am hai har jins-e-behtar ka black

aarzu ka waqt ka sangam ka leader ka black

yan shakil o sahir o majruh o aKHtar ka black

ja'fri to ja'fri Thahre muzaffar ka black

dekh kar is shahr ke andaz dil hairan hai

bambai kahe ko hai pura jamalistan hai