aurat

baḌhātī huuñ qadam

fauran hī pīchhe khīñch letī huuñ

ye andesha mujhe aage kabhī baḌhne nahīñ detā

na-jāne log kyā socheñ

na-jāne log kyā boleñ

isī ik ḳhauf ke ghere meñ jiitī aur martī huuñ

magar kab tak

tashaḳhḳhus ke liye apnī zarūrī ho gayā hai ab

uThūñ aur kaaT duuñ ek ek kar ke beḌiyāñ saarī

baġhāvat kar duuñ duniyā kī

sabhī farsūda rasmoñ se

har ik dastūr-e-bejā se

ḳhudā ne jab kisī se merā rutba kam nahīñ rakkhā

to kis ne haq diyā un ko

mujhe zanjīr pahnā.eñ

zabāñ kholūñ jo apne vāste taalā lagā jaa.eñ

mujhe ma.alūm hai merī muqarrar had kahāñ tak hai

mujhe hai paas apnī hurmat-o-qadr-o-rivāyat kā

vafā nāmūs-o-iffat kā sharāfat aur azmat kā

ki ye aqdār mere paañv kī beḌī nahīñ hargiz

inhīñ aqdār ke hamrāh mujh ko aage baḌhnā hai

milā hai haq mujhe bhī

vaqt ke hamrāh chalne kā

ḳhud apne ḳhvāb bunñe kā

inheñ ta.abīr dene kā

ye duniyā mere hāthoñ se qalam jo chhīn letī hai

hamesha chūlhe-chauke tak hī bas mahdūd rakhtī hai

ise shāyad yahī ḳhadsha satātā rahtā hai har-dam

mirī ye āgahī mujh ko na.ī pahchān de degī

baDhati hun qadam

fauran hi pichhe khinch leti hun

ye andesha mujhe aage kabhi baDhne nahin deta

na-jaane log kya sochen

na-jaane log kya bolen

isi ek KHauf ke ghere mein jiti aur marti hun

magar kab tak

tashaKHKHus ke liye apni zaruri ho gaya hai ab

uThun aur kaT dun ek ek kar ke beDiyan sari

baghawat kar dun duniya ki

sabhi farsuda rasmon se

har ek dastur-e-beja se

KHuda ne jab kisi se mera rutba kam nahin rakkha

to kis ne haq diya un ko

mujhe zanjir pahnaen

zaban kholun jo apne waste tala laga jaen

mujhe malum hai meri muqarrar had kahan tak hai

mujhe hai pas apni hurmat-o-qadr-o-riwayat ka

wafa namus-o-iffat ka sharafat aur azmat ka

ki ye aqdar mere panw ki beDi nahin hargiz

inhin aqdar ke hamrah mujh ko aage baDhna hai

mila hai haq mujhe bhi

waqt ke hamrah chalne ka

KHud apne KHwab bunne ka

inhen tabir dene ka

ye duniya mere hathon se qalam jo chhin leti hai

hamesha chulhe-chauke tak hi bas mahdud rakhti hai

ise shayad yahi KHadsha satata rahta hai har-dam

meri ye aagahi mujh ko nai pahchan de degi