ek pahaD aur gilahri

koī pahāḌ ye kahtā thā ik gilahrī se

tujhe ho sharm to paanī meñ jā ke Duub mare

zarā sī chiiz hai is par ġhurūr! kyā kahnā!

ye aql aur ye samajh ye shu.ūr! kyā kahnā!

ḳhudā kī shaan hai nā-chīz! chiiz ban baiTheñ!

jo be-shu.ūr hoñ yuuñ bā-tamīz ban baiTheñ!

tirī bisāt hai kyā merī shaan ke aage

zamīñ hai past mirī ān-bān ke aage

jo baat mujh meñ hai tujh ko vo hai nasīb kahāñ

bhalā pahāḌ kahāñ jānvar ġharīb kahāñ!

kahā ye sun ke gilahrī ne muñh sambhāl zarā

ye kachchī bāteñ haiñ dil se inheñ nikāl zarā!

jo maiñ baḌī nahīñ terī tarah to kyā parvā!

nahīñ hai tū bhī to āḳhir mirī tarah chhoTā

har ek chiiz se paidā ḳhudā kī qudarat hai

koī baḌā koī chhoTā ye us kī hikmat hai

baḌā jahān meñ tujh ko banā diyā us ne

mujhe daraḳht pe chaḌhnā sikhā diyā us ne

qadam uThāne kī tāqat nahīñ zarā tujh meñ

nirī baḌā.ī hai! ḳhūbī hai aur kyā tujh meñ

jo tū baḌā hai to mujh sā hunar dikhā mujh ko

ye chhāliyā hī zarā toḌ kar dikhā mujh ko

nahīñ hai chiiz nikammī koī zamāne meñ

koī burā nahīñ qudarat ke kār-ḳhāne meñ

koi pahaD ye kahta tha ek gilahri se

tujhe ho sharm to pani mein ja ke Dub mare

zara si chiz hai is par ghurur! kya kahna!

ye aql aur ye samajh ye shuur! kya kahna!

KHuda ki shan hai na-chiz! chiz ban baiThen!

jo be-shuur hon yun ba-tamiz ban baiThen!

teri bisat hai kya meri shan ke aage

zamin hai past meri aan-ban ke aage

jo baat mujh mein hai tujh ko wo hai nasib kahan

bhala pahaD kahan jaanwar gharib kahan!

kaha ye sun ke gilahri ne munh sambhaal zara

ye kachchi baaten hain dil se inhen nikal zara!

jo main baDi nahin teri tarah to kya parwa!

nahin hai tu bhi to aaKHir meri tarah chhoTa

har ek chiz se paida KHuda ki qudarat hai

koi baDa koi chhoTa ye us ki hikmat hai

baDa jahan mein tujh ko bana diya us ne

mujhe daraKHt pe chaDhna sikha diya us ne

qadam uThane ki taqat nahin zara tujh mein

niri baDai hai! KHubi hai aur kya tujh mein

jo tu baDa hai to mujh sa hunar dikha mujh ko

ye chhaaliya hi zara toD kar dikha mujh ko

nahin hai chiz nikammi koi zamane mein

koi bura nahin qudarat ke kar-KHane mein