eid ki achkan

sajtī thī kabhī tan pe jo thī eid kī achkan

sajte the kabhī ham, to kabhī eid kī achkan

sau sau tarah parvān chaḌhī eid kī achkan

ab itne ghaTe ham ki baḌhī eid kī achkan

achkan nahīñ is vaqt abā aur qabā hai

yā koī do-shāla hai jo khūñTī pe Tañgā hai

is eid kī achkan ne machā.ī thī baḌī dhuum

jab is ko pahante to chamak uThtā thā maqsūm

jaate jo kahīñ duur se ho jaatā thā ma.alūm

ham is meñ nazar aate the jaise ki hoñ ma.asūm

is eid kī achkan meñ baḌe la.al jaḌe the

eidī bhī hameñ dete the jau ham se baḌe the

us ahd meñ ye eid kī achkan thī banā.ī

jis ahd meñ ham khāte the baabā kī kamā.ī

dete na the aflās kī us vaqt duhā.ī

mil jaatī thī jis shai kī zarūrat nazar aa.ī

har baat pe jab ruuTh ke hañsne kā maza thā

tab eid kī achkan ke pahanñe kā maza thā

is eid kī achkan ko pahan lete the jab ham

aatī thī nazar hech hameñ saltanat-e-jam

jis ne mujhe dekhā vo yahī kahtā thā har dam

''jab tak ki na dekhā thā qad-e-yār kā ālam''

''maiñ mo'taqid-e-fitna-e-mahshar na huā thā''

maiñ bhī ġham-e-duniyā kā shanāvar na huā thā

is eid kī achkan ne gale un se milāyā

ghabrātā thā paas aane se jin logoñ kā saaya

kis kis ke na jaane but-e-pindār ko Dhāyā

jab eid kā din aayā to phir dil ko sajāyā

achkan nahīñ maazī kā sunahrā sā varaq hai

ham badle par achkan nahīñ badlī ye qalaq hai

ai 'ja.afarī' achkan ko na laTkā mire aage

''juz vahm nahīñ hastī-e-ashiyā mire āge''

vo dhuup Dhalī rah gayā saayā mire aage

ab qissa-e-māzī ko na dohrā mire aage

kaam aa.ī ye achkan na ġharīb-ul-vatanī meñ

''har-chand subuk-dast hue but-shikanī meñ''

sajti thi kabhi tan pe jo thi eid ki achkan

sajte the kabhi ham, to kabhi eid ki achkan

sau sau tarah parwan chaDhi eid ki achkan

ab itne ghaTe hum ki baDhi eid ki achkan

achkan nahin is waqt aba aur qaba hai

ya koi do-shaala hai jo khunTi pe Tanga hai

is eid ki achkan ne machai thi baDi dhum

jab is ko pahante to chamak uThta tha maqsum

jate jo kahin dur se ho jata tha malum

hum is mein nazar aate the jaise ki hon masum

is eid ki achkan mein baDe lal jaDe the

eidi bhi hamein dete the jau hum se baDe the

us ahd mein ye eid ki achkan thi banai

jis ahd mein hum khate the baba ki kamai

dete na the aflas ki us waqt duhai

mil jati thi jis shai ki zarurat nazar aai

har baat pe jab ruTh ke hansne ka maza tha

tab eid ki achkan ke pahanne ka maza tha

is eid ki achkan ko pahan lete the jab hum

aati thi nazar hech hamein saltanat-e-jam

jis ne mujhe dekha wo yahi kahta tha har dam

jab tak ki na dekha tha qad-e-yar ka aalam

main mo'taqid-e-fitna-e-mahshar na hua tha

main bhi gham-e-duniya ka shanawar na hua tha

is eid ki achkan ne gale un se milaya

ghabraata tha pas aane se jin logon ka saya

kis kis ke na jaane but-e-pindar ko Dhaya

jab eid ka din aaya to phir dil ko sajaya

achkan nahin mazi ka sunahra sa waraq hai

hum badle par achkan nahin badli ye qalaq hai

ai 'jafari' achkan ko na laTka mere aage

juz wahm nahin hasti-e-ashiya mere aage

wo dhup Dhali rah gaya saya mere aage

ab qissa-e-mazi ko na dohra mere aage

kaam aai ye achkan na gharib-ul-watani mein

har-chand subuk-dast hue but-shikani mein