pardes mein eid

suno ai des ke logo

ki ye jo iid kā din hai

agar pardes meñ aa.e

na ḳhushiyāñ paas hotī haiñ

na koī muskurātā hai

ḳhushī ġham se lipaTtī hai

udāsī muskurātī hai

suno ai des ke logo

tumhārī yaad aatī hai

hameñ phir yaad aatī haiñ

suhāne des kī yādeñ

vo bachpan aur javānī ke suhāne din

na pūchho kis tarah se ham

gharoñ kī baat karte aur phir aañsū chhupāte haiñ

bujhe dil muskurāte haiñ

suno ai des ke logo

hameñ shiddat se apnā daur-e-bachpan yaad aatā hai

hameñ maaoñ kī mīThī mīThī mamtā yaad aatī hai

hañsātī hai rulātī hai

tasallī ke liye ham ek duuje se ye kahte haiñ

dinoñ kī baat hai ham bhī vatan ko lauT jā.eñge

yaqīnan eid aglī apne apne ghar manāeñge

suno ai des ke logo

agar sach baat pūchho to

gharoñ ko

yaad karne se

koī fariyād karne se

thakan se chuur hone se

bahut majbūr hone se

kisī ko kuchh nahīñ miltā

koī dar bhī nahīñ khultā

suno ai des ke logo

ki ye jo id ka din hai

agar pardes mein aae

na KHushiyan pas hoti hain

na koi muskuraata hai

KHushi gham se lipaTti hai

udasi muskuraati hai

suno ai des ke logo

tumhaari yaad aati hai

hamein phir yaad aati hain

suhane des ki yaaden

wo bachpan aur jawani ke suhane din

na puchho kis tarah se hum

gharon ki baat karte aur phir aansu chhupate hain

bujhe dil muskuraate hain

suno ai des ke logo

hamein shiddat se apna daur-e-bachpan yaad aata hai

hamein maon ki miThi miThi mamta yaad aati hai

hansati hai rulati hai

tasalli ke liye hum ek duje se ye kahte hain

dinon ki baat hai hum bhi watan ko lauT jaenge

yaqinan eid agli apne apne ghar manaenge

suno ai des ke logo

agar sach baat puchho to

gharon ko

yaad karne se

koi fariyaad karne se

thakan se chur hone se

bahut majbur hone se

kisi ko kuchh nahin milta

koi dar bhi nahin khulta