taj-mahal

allāh maiñ ye taaj mahal dekh rahā huuñ

yā pahlū-e-jamunā meñ kañval dekh rahā huuñ

ye shaam kī zulfoñ meñ simaTte hue anvār

firdaus-e-nazar tāj-mahal ke dar-o-dīvār

aflāk se yā kāhkashāñ TuuT paḌī hai

yā koī hasīna hai ki be-parda khaḌī hai

is ḳhaak se phūTī hai zuleḳhā kī javānī

yā chaah se niklā hai koī yūsuf-e-sānī

gul-dasta-e-rañgīñ kaf-e-sāhil pe dharā hai

billor kā sāġhar hai ki sahbā se bharā hai

āġhosh-e-tajallī meñ nazar soī huī hai

yā shaam ke zaanū pe sahar soī huī hai

yā bar-lab-e-jamunā koī doshīza nahā kar

baiThī hai takalluf se adāoñ ko churā kar

Thahrī huī yā husn ke markaz pe nazar hai

yā vaqt ke hāthoñ meñ garebān-e-sahar hai

yā koī bat-e-mast hai jo tair chukī hai

aa kar abhī dariyā ke kināre pe rukī hai

yā nuur kā Tiikā koī sāhil kī jabīñ par

yā ālam-e-bālā utar aayā hai zamīñ par

yā husn ke iqbāl kā chamkā hai sitārā

nikhrī huī chāñdī hai ki Thahrā huā paarā

hauzoñ ke ḳhazāne haiñ ki bikhre se paḌe haiñ

pahre pe nigahbān haiñ yā sarv khaḌe haiñ

yā taaj qarīne se abhī rakh ke zamīñ par

soyā hai koī bādshah-e-vaqt yahīñ par

tasvīr liye letā hai har hauz kā paanī

goyā ki javānī ke muqābil hai javānī

qudrat ne use auj diyā ḳhaak pe lā ke

ye saada sā motī thā ḳhazāne meñ ḳhudā ke

hai taḳht to maujūd sulaimāñ kī kamī hai

jannat kā darīcha to hai rizvāñ kī kamī hai

ye gul-kada kahiye jise firdaus kā ḳhāka

hai dafn yahīñ ḳhaak meñ sarmāya vafā kā

goshe meñ isī qasr ke do dil haiñ ham-āġhosh

sho.ale haiñ magar maslahat-e-vaqt se ḳhāmosh

is ḳhvāb meñ un ko nahīñ ḳhud apnī ḳhabar tak

ik nuur uḌā jaatā hai parvāz-e-nazar tak

nazroñ meñ abhī tak vahī dilchasp samāñ hai

āñkhoñ meñ mirī ḳhvāb-gah-e-shāhjāñ hai

allah main ye taj mahal dekh raha hun

ya pahlu-e-jamuna mein kanwal dekh raha hun

ye sham ki zulfon mein simaTte hue anwar

firdaus-e-nazar taj-mahal ke dar-o-diwar

aflak se ya kahkashan TuT paDi hai

ya koi hasina hai ki be-parda khaDi hai

is KHak se phuTi hai zuleKHa ki jawani

ya chah se nikla hai koi yusuf-e-sani

gul-dasta-e-rangin kaf-e-sahil pe dhara hai

billor ka saghar hai ki sahba se bhara hai

aaghosh-e-tajalli mein nazar soi hui hai

ya sham ke zanu pe sahar soi hui hai

ya bar-lab-e-jamuna koi doshiza naha kar

baiThi hai takalluf se adaon ko chura kar

Thahri hui ya husn ke markaz pe nazar hai

ya waqt ke hathon mein gareban-e-sahar hai

ya koi bat-e-mast hai jo tair chuki hai

aa kar abhi dariya ke kinare pe ruki hai

ya nur ka Tika koi sahil ki jabin par

ya aalam-e-baala utar aaya hai zamin par

ya husn ke iqbaal ka chamka hai sitara

nikhri hui chandi hai ki Thahra hua para

hauzon ke KHazane hain ki bikhre se paDe hain

pahre pe nigahban hain ya sarw khaDe hain

ya taj qarine se abhi rakh ke zamin par

soya hai koi baadshah-e-waqt yahin par

taswir liye leta hai har hauz ka pani

goya ki jawani ke muqabil hai jawani

qudrat ne use auj diya KHak pe la ke

ye sada sa moti tha KHazane mein KHuda ke

hai taKHt to maujud sulaiman ki kami hai

jannat ka daricha to hai rizwan ki kami hai

ye gul-kada kahiye jise firdaus ka KHaka

hai dafn yahin KHak mein sarmaya wafa ka

goshe mein isi qasr ke do dil hain ham-aghosh

shoale hain magar maslahat-e-waqt se KHamosh

is KHwab mein un ko nahin KHud apni KHabar tak

ek nur uDa jata hai parwaz-e-nazar tak

nazron mein abhi tak wahi dilchasp saman hai

aankhon mein meri KHwab-gah-e-shahjaan hai